《興趣, 一世的嗎?》

上一期我教新聞嗰一part嘅時候, 提過興趣依家嘢其實有機會會變的, 我好想係嗰堂講多啲例子, 但上堂時間有限, 所以只係講咗少少~ 趁有版位, 就係依度同你地分享多啲啦~

其實, 首先應該問咗一條好關鍵嘅問題先: 你有咩嗜好? 有咩興趣?
有學生答:「我對咩都冇興趣」呀! 吓, 我懷疑佢有抑鬱症。做人對任何嘢都冇興趣, 好灰啊。無論係咩人點都應該對某啲嘢有興趣嘅: 例如瞓覺、食嘢等等~ 你有冇諗過, 你今日鍾意瞓覺, 10年/20年/30年之後, 你會唔會都咁鍾意瞓覺呢?

例如, 如果你依家好鍾意瞓覺, 而同時你又係一個好鍾意錢嘅人, 10年之後你做緊老闆, 你會唔會因為鍾意瞓覺而有一單生意可以賺1000萬嘅, 你都會放棄佢走去瞓覺?

又例如, 你依家好鍾意打機, 20年後你有小朋友, 你又會唔會唔同你嘅小朋友落街打吓鞦韆, 而自己對住電視怒打機呢?

以前嘅我, 成日同人講「我好鍾意xxx㗎, 簡直係我生命, 冇咗佢真係唔得㗎。」依家大個咗, 結論係:「依個世界, 冇話冇咗咩唔得, 除咗氧氣!」

細個有一排好鍾意食腸仔, 燒賣同雞翼, 幾乎每日都食, 呀媽冇煮依啲我就發老脾。 呀媽問:「係咪食少一日你會死?」我答:「係! 會死! 唔開心到死死死死死死死!!!」 依家咁大個人, 諗番當日自己咁講真係超低能。依家我都鍾意食依3寶, 不過又唔會因為冇得食而唔開心囉, 原因可能係: 1) 大個咗, 食過嘅嘢多咗, 知道依個世界其實有更好味嘅嘢食, 無需只迷戀喺某幾種食物。2) 口味會變, 以前鍾意食辣嘢, 依家都可以冇咁鍾意。3)今日食唔到, 咪聽日食番囉。

「世事變幻無常」是常識吧。當我以前仲係18/22歲嘅時候, 男朋友送花俾我, 一定係好開心。 反而送慣咗的話, 如果有次大時大節佢唔送花嚟, 我一定火都嚟埋, 仲會心諗, 條友仔一定已經冇咁鍾意我啦。到依家大個咗, 我都好欣賞人送花俾我嘅, 但同以前唔同, 我唔會再咁膚淺純粹睇吓束花靚唔靚, 係咪係agnes b 度買, 而會用個心去感受吓送花嘅人係咪真心嘅, 如果佢係同一時間買左5束俾5個女人, 束花幾靚都冇用啦。所以其實「興趣 / 鍾意一樣嘢」, 可能去到最後會變得唔鍾意, 又或者鍾意嘅程度或方式係會變的。

到咗依家, 有啲記者訪問我時都會問:「Mia, 你咁鍾意教英文, 依盤生意有冇諗過第日點樣再發大啲嚟做, 等多啲學生可以受惠?」 我唔敢答佢我一定會發大嚟做, 因為我知道, 我十幾年前好鍾意教英文, 依家都係好享受做英文科補習天后, 但咁唔代表我一定會繼續鍾意係大型補習社裡面教英文。可能第時突然有一日, 我唔再鍾意香港依啲咁大壓力嘅城市, 移民去外國呢? 唔通叫我去英國教英國人英文咩? 咁咪轉做另一啲我有興趣嘅工囉~ 又或者, 第日我已plan好死前嘅生活開支, 發覺唔洗餓死, 咁就唔再喺補習社教, 反而唔收學生$咁義教呢? 又或者20年後, 當我變咗Mia嬸嬸, 邊仲有力氣喺課室再出盡力咁連講6個鐘。 到時被迫停教, 就會轉另一啲需要少啲體力嘅工。好多嘢都話唔埋嘅, 活在當下, 好好享受依家鍾意做嘅嘢, 唔洗諗咁多未發生嘅無聊嘢。

想令自己第日生活愉快啲, 不如發掘多啲興趣, 起碼第日當你發現唔再like興趣A時, 轉去興趣B, 彈性都大啲, 自由度又多啲, 你話幾好~

但同一理論, 可唔可以應用喺愛情? 即係今日你love佢, 會唔會有一日唔再love佢? 為咗令第日彈性大啲, 係咪應該今日發掘定對象A, 對象B, 對象C呢? Hm…我認為, 唔同人有唔同嘅睇法。  廢話 / 客觀結尾…
2013年11月