在下Mia，未請教

一直鍾意寫blog，因為我鍾意同人分享。未知內容會否得到你的共鳴呢？因上努力·果上隨緣。

在下Mia，未請教

一直鍾意寫blog，因為我鍾意同人分享。未知內容會否得到你的共鳴呢？因上努力·果上隨緣。

《做人為乜》

一名中六同學在Instagram對我說：「Mia，睇完你之前嗰篇『看透』人生後，好感觸，想Mia大師你開解吓我。

一名中六同學在Instagram對我說：「Mia，睇完你之前嗰篇『看透』人生後，好感觸，想Mia大師你開解吓我。其實我真係唔知做人為乜，讀書又為乜，最慘係我無任何夢想，連選讀咩科都係阿爸阿媽話事，我就好似扯線公仔咁，每日做人哋想我做嘅事，生活好沒趣。」都不知年中有多少人與我談做人的意義，上至40歲，下至10歲。連我自己都曾經問過我自己，教書都教咗差不多20年，事業成就我已很滿意，愛情又已穩定了，又無需要煩著如何養大自己的兒女，旅行想去的地方都去得7788，財富都尚算足夠我用到死嗰日，又無仇要報，無怨要化。簡單來說，如果這一刻要被皇上賜毒酒，我都可以暢飲一番，來多兩打，此生無憾。那麼我再生存多一日，又有何意義呢？大家睇到呢度，是「很有同感，想與我來一次集體自殺」？或是想問Mia「那為何你仲未死」？我睇過一本書，作者以茶比喻人生。茶葉放在杯裡，剛沖第一泡，香濃可口。再來第二、三、四泡，味轉淡。直至最後完全無味，被掉進垃圾筒。人一出世，由青年至老，最後被放入棺木，可有例外？被掉的茶葉，看似廢物，毫不起眼，誰會珍惜？雖說最後還是被棄，但別忘記你曾經令喝茶的人陶醉，你的餘香還留在他口中一陣子，為他解渴生津。落堂後，我帶著疲憊的身軀，偶爾會想：「好攰，我應選擇明年繼續教，或是放棄那些收入，好好養身？」如考慮的只是薪金，我相信我一早已離開了這行業。回家後看看messages，「Mia，我想問今日你教嗰個grammar用法，可唔可以xxx㗎？」、「Mia，我今次test終於合格啦，多謝你呀！」、「Miss Wong，辛苦你咁盡力教我個仔，我叫佢下一堂拎樽陳皮冰糖燉檸檬比你潤潤喉吖」…… 我教的每一堂，雖不能像愛迪生般對世界作出偉大貢獻，但那怕只影響到一小部份的人，能為他們生津解渴，看來都沒有白過的。或許還殘留著一絲餘香，為他們帶來美好回憶，都也不錯。你覺得你的存在沒意義嗎？想想每日你父母見到你平安回家，安樂又快樂；想想喜歡你的人能見你一面，心仔卜卜咁跳；想想每次你同朋友傾計散心後，他一副釋懷感激的樣子；想想你摸著愛犬，牠歡喜地擺尾轉轉圈。其實你每天做的一切，都在影響及改變身邊的人的心情及想法，你絕不是一無是處的。至於同學問我「讀書為乜」，你唔讀書，又何來識字睇得明我以上寫的？又何來有能力將你心中所想的有條理及清晰地告訴他人？又何來有足夠的智慧去理解人生的意義呢？有了智慧，才不會容易被騙，才有能力分析做甚麼是對，才有資格自己去選擇一條對自己有益、又對別人無害的路，才不會再做別人的扯線公仔。當你掌握到應如何好好過你的人生，生活再也不是沒趣的了。 2018年10月2日

《我要瞓街》

有位中六學生在 Snapchat 向我訴心聲：「Mia，你有冇睇《100毛》啲片？東方昇最近有條片訪問咗個瞓街嘅男人，佢好自由自在，唔使返工，鍾意去邊就去邊。

有位中六學生在 Snapchat 向我訴心聲：「Mia，你有冇睇《100毛》啲片？東方昇最近有條片訪問咗個瞓街嘅男人，佢好自由自在，唔使返工，鍾意去邊就去邊。其實我都覺得瞓街係冇所謂，仲可以成日搬，幾爽！我都唔想考 DSE 呀，好大壓力。我都想無憂無慮呀。」我都有睇過瞓街條片，睇落個男人的確生活得幾開心。不用返工，每日就做自己喜歡做的事。雖然身無分文，但又不愁起居飲食。每日去不同的餐廳食其他人食剩的食物，麥當勞係佢最愛去的。佢亦愛去圖書館，睇書打發時間。至於瞓覺嘅地方，佢找到銅鑼灣一處連「山竹」都影響唔到嘅安靜地。佢不怕睡覺時被人襲擊嗎？佢好聰明，長期放一隻毛公仔喺身體，讓人覺得他是有精神病的，就安全好多。片中他說自己沒有女朋友，沒有親人，每日背著幾個背包周圍走。同學，first of all，Mia 實在沒資格去左右你嘅人生，因每人都有權去選擇自己的人生應怎樣過。我說的，只是給你提供多一個思考的角度。凡事「有得必有失」，重點是對於你來說，「失去了的」你是否輸得起？會否令你抱憾終身？如果「得到的」帶給你的滿足感能完全補償到你「失去的」，你便去做，我完全贊成！等我自己都想一想先，假如我選擇瞓街…… 「得到的」：每日24小時都是屬於我的，而不是屬於我老闆的，再也不是工作的奴隸。我可以去圖書館，因為我實在太鍾意睇書，我相信公共圖書館的藏書庫應該夠我睇一世，加上該處冬暖夏涼，逗留在圖書館內實在舒適。我可以去沙灘散步，因為我鍾意聽海浪聲，順便去公廁沖埋涼。我可以去行山，因為我鍾意聞花草香味，順便摘安全嘅野果食。我可以在公園義教英文，因為我鍾意同人分享我知道的，順便跳下廣場舞舒筋活骼。「失去的」：我想去日本/澳洲旅行，點算？冇得去。我男友/老公會否接受我瞓街？會唔會一齊陪我瞓街？可能要分手。我阿爸阿媽阿哥細佬會點睇我呢？可能要斷六親。我啲朋友會唔會繼續同我玩呢？起碼睇戲 / 唱K / 打牌呢啲要洗錢嘅活動一定冇我份。即是我要瞓街，必先要承受到以上「失去的」。Sorry，我做唔到！我寧願返工賺錢換取我不想失去的。但正如我所講，「有得必有失」，過度工作又會帶來另一些「失去的」：健康及自由。所以，我選擇取一個平衡！我不求大富大貴，因超多的財富多來自超多的辛勞或出賣人格的愧疚。我寧願每日自在生活。金錢，夠每日起居生活就夠了。我亦不求每日無所事事百無聊賴，因當人生再沒有目標及寄託，好易患上抑鬱症的。現在的我，工作與享受人生之間取得一個超好的平衡，是我最感恩的。希望同學你有一日都能與我一樣找到個平衡點，令每日的你都活得快樂。 2018年12月20日

《炫富大贏家》

昨晚「中女八婆會」聚會，熱烈討論一位常在Facebook上炫富的舊同學，娛樂指數極高，眾人樂透。

昨晚「中女八婆會」聚會，熱烈討論一位常在Facebook上炫富的舊同學，娛樂指數極高，眾人樂透。他Facebook主頁內容充斥着不外乎是剛買了過百萬名車、在五星級酒店吃飯、在名店買包包等。正所謂「識睇一定睇留言」，數十個表面上羨慕，實質在揶揄的留言，乃娛樂性最豐富的位置，不容錯過。每日在刷存在感，仍需靠物質去獲取別人認同，於我所見，「我執」極強，執着於別人對「我」的看法，還未真正懂得「看透」人生。我曾經有一劍橋大學博士男朋友，在香港大學當教授。每當他向新朋友自我介紹時，總是「烚熟狗頭」「懶幽默」地笑着說自己是「誤人子弟的小書童」。當時只有廿多歲的我，無知好奇一問「點解你唔話俾人聽自己係博士教授？」他當日的回應仍令我回味：「第一，哈佛博士、牛津博士多的是，唔覺得自己有乜咁驚為天人。第二，真心朋友係唔會計較你係劍橋博士，定係劍橋老人院院友。第三，腹有詩書氣自華，一個有修養有學識嘅人，從言談間對方已經感受到，唔需要刻意『撻朵』的。」男人，謙厚且有實力的最吸引。感激天意碰着你。我亦曾經遇過一個當律師的男朋友，他的口頭禪是「出咗糧未？今個月出幾多？」真的重要嗎？究竟你是愛我，還是愛一個有資格與你競賽的女人？他贏了就到處自吹自擂扮晒嘢，他輸了便終日愁眉不展小氣鬼。看著他，我看不到謙卑，只見到自卑。人類，喜歡比較的最可憐，讓我見識一番，亦感激天意碰着你。愛show off 的人，究竟最後贏到什麼？為何一個真正富有的人，甚少喜歡周圍宣揚？確實少見李嘉誠每日post自己的豪宅及名車。或許當富有到一個點，你眼見的物質都是微不足道，不值一提的。追求心中富有，才是人生真正課題。愛炫富的舊同學，你終究都是贏了，除了贏了大家的笑聲，亦贏了我的時間有感而發寫下以上的作分享。感激天意碰着你。 #我沒有掛住舊男友 #側邊嗰件迫我補番呢句 2020年10月7日

《興趣, 一世的嗎?》

上一期我教新聞嗰一part嘅時候, 提過興趣依家嘢其實有機會會變的, 我好想係嗰堂講多啲例子, 但上堂時間有限, 所以只係講咗少少~ 趁有版位, 就係依度同你地分享多啲啦~

上一期我教新聞嗰一part嘅時候, 提過興趣依家嘢其實有機會會變的, 我好想係嗰堂講多啲例子, 但上堂時間有限, 所以只係講咗少少~ 趁有版位, 就係依度同你地分享多啲啦~ 其實, 首先應該問咗一條好關鍵嘅問題先: 你有咩嗜好? 有咩興趣? 有學生答:「我對咩都冇興趣」呀! 吓, 我懷疑佢有抑鬱症。做人對任何嘢都冇興趣, 好灰啊。無論係咩人點都應該對某啲嘢有興趣嘅: 例如瞓覺、食嘢等等~ 你有冇諗過, 你今日鍾意瞓覺, 10年/20年/30年之後, 你會唔會都咁鍾意瞓覺呢? 例如, 如果你依家好鍾意瞓覺, 而同時你又係一個好鍾意錢嘅人, 10年之後你做緊老闆, 你會唔會因為鍾意瞓覺而有一單生意可以賺1000萬嘅, 你都會放棄佢走去瞓覺? 又例如, 你依家好鍾意打機, 20年後你有小朋友, 你又會唔會唔同你嘅小朋友落街打吓鞦韆, 而自己對住電視怒打機呢? 以前嘅我, 成日同人講「我好鍾意xxx㗎, 簡直係我生命, 冇咗佢真係唔得㗎。」依家大個咗, 結論係:「依個世界, 冇話冇咗咩唔得, 除咗氧氣!」細個有一排好鍾意食腸仔, 燒賣同雞翼, 幾乎每日都食, 呀媽冇煮依啲我就發老脾。呀媽問:「係咪食少一日你會死?」我答:「係! 會死! 唔開心到死死死死死死死!!!」依家咁大個人, 諗番當日自己咁講真係超低能。依家我都鍾意食依3寶, 不過又唔會因為冇得食而唔開心囉, 原因可能係: 1) 大個咗, 食過嘅嘢多咗, 知道依個世界其實有更好味嘅嘢食, 無需只迷戀喺某幾種食物。2) 口味會變, 以前鍾意食辣嘢, 依家都可以冇咁鍾意。3)今日食唔到, 咪聽日食番囉。「世事變幻無常」是常識吧。當我以前仲係18/22歲嘅時候, 男朋友送花俾我, 一定係好開心。反而送慣咗的話, 如果有次大時大節佢唔送花嚟, 我一定火都嚟埋, 仲會心諗, 條友仔一定已經冇咁鍾意我啦。到依家大個咗, 我都好欣賞人送花俾我嘅, 但同以前唔同, 我唔會再咁膚淺純粹睇吓束花靚唔靚, 係咪係agnes b 度買, 而會用個心去感受吓送花嘅人係咪真心嘅, 如果佢係同一時間買左5束俾5個女人, 束花幾靚都冇用啦。所以其實「興趣 / 鍾意一樣嘢」, 可能去到最後會變得唔鍾意, 又或者鍾意嘅程度或方式係會變的。到咗依家, 有啲記者訪問我時都會問:「Mia, 你咁鍾意教英文, 依盤生意有冇諗過第日點樣再發大啲嚟做, 等多啲學生可以受惠?」我唔敢答佢我一定會發大嚟做, 因為我知道, 我十幾年前好鍾意教英文, 依家都係好享受做英文科補習天后, 但咁唔代表我一定會繼續鍾意係大型補習社裡面教英文。可能第時突然有一日, 我唔再鍾意香港依啲咁大壓力嘅城市, 移民去外國呢? 唔通叫我去英國教英國人英文咩? 咁咪轉做另一啲我有興趣嘅工囉~ 又或者, 第日我已plan好死前嘅生活開支, 發覺唔洗餓死, 咁就唔再喺補習社教, 反而唔收學生$咁義教呢? 又或者20年後, 當我變咗Mia嬸嬸, 邊仲有力氣喺課室再出盡力咁連講6個鐘。到時被迫停教, 就會轉另一啲需要少啲體力嘅工。好多嘢都話唔埋嘅, 活在當下, 好好享受依家鍾意做嘅嘢, 唔洗諗咁多未發生嘅無聊嘢。想令自己第日生活愉快啲, 不如發掘多啲興趣, 起碼第日當你發現唔再like興趣A時, 轉去興趣B, 彈性都大啲, 自由度又多啲, 你話幾好~ 但同一理論, 可唔可以應用喺愛情? 即係今日你love佢, 會唔會有一日唔再love佢? 為咗令第日彈性大啲, 係咪應該今日發掘定對象A, 對象B, 對象C呢? Hm…我認為, 唔同人有唔同嘅睇法。  廢話 / 客觀結尾… 2013年11月

《同學，你又抑鬱呀？》

最近越來越多同學同我講「Miss，我好似有抑鬱／我都有抑鬱／我又有抑鬱」。十多年前，我的學生只會話「Miss，我最近有啲唔開心」。

最近越來越多同學同我講「Miss，我好似有抑鬱／我都有抑鬱／我又有抑鬱」。十多年前，我的學生只會話「Miss，我最近有啲唔開心」。究竟是現今的同學誇大了「唔開心」，或是以前的同學低估了「抑鬱」？Mia不是精神科醫生，亦不是心理學家，沒資格判斷你的病情，只能以過來人身分同你開心share。「年輕時要『看遠』，中年時會『看透』，年老時便『看淡』。」一位年屆70歲的伯伯同你講「食幾多著幾多都係整定，無謂強求」。這是「看淡」名利，一切隨緣。一位40歲的長輩同你講「當你大個咗再睇番以前所謂嘅『失意』，其實好少事」。這是「看透」人生，明白世事無常，深明「活著，就是一種修行」。一位後生仔為某事耿耿於懷，愁眉不展。這是做不到「看遠」。世界多大，你還未看夠。以往廿多歲的我，不懂「看遠」，只顧眼前的：今日咁教，學生滿意嗎？今期學生人數如何？公司有否在宣傳照上放我在中間？對手強嗎？今個月出多少糧？男友今日有否去「滾」？今日比噚日更愛我嗎？結果，當遇到事業及愛情失意時，不能自拔，壞情緒湧現。治療方法：長埋書店及圖書館。閉關多月，發現原來世界真的很大，相比起各位作者，我的所謂「失意」，只因智慧不足，未能「看遠」及「看透」。現在中年的我，學會放下執著，凡事都不會看得太重，以免傷身又傷心。有永遠的事業高峰嗎？不斷有高峰到終老對我來說是可悲的，這意味著一生勞碌，難以享受生命中其他的種種。有更多的財富便快樂嗎？當你發現原來「食得飽、穿得暖、睡得夠」是幸福的最基本時，你已經擁有了，又何須捱壞身子追求多餘的？「福」字，是「衣」加「一口田」，你有所缺嗎？有條件更好的愛人嗎？遇過無數別人口中的「賤男」，我明瞭到「愛情不應強求」，「一切都是最好的安排」。過去的，我沒後悔。他們讓我成長，令我更了解自己，方向明確地尋找最適合我的伴侶。找對了，便好好珍惜。無須羨慕他人，自招煩惱。有永恆的健康與青春嗎？人老了，身體機能變差是正常的。你為何笨到要與「18歲卜卜脆」的比較呢？這種羨慕與妒忌，就像水中的魚羨慕空中飛翔的鳥一樣，不切實際。活在不同的時空，不好比較。難度世上真的有長生不老、反老頑童的仙丹妙藥？你只需保持心境開朗，坦然接受每天的變化，便可活得自在。當一切都被你「看透」了，「不以物喜，不以己悲」，以淡然平靜的心態看待人生的高低，你便快樂。同學，看完整篇，你還是抑鬱嗎？歡迎致電「黃美亞防止自殺會」熱線，專人接聽，費用全免。 2018年8月24日

《朋友，你寂寞嗎？》

識我的學生及朋友們，都知道我係一個好怕悶的人，滿腦子鬼主意，就是想令事情變得有趣。身邊活到中年的朋友，大多都感到生活苦悶，每日重複做相同的事，聚會中最常傾的哲學話題是：人生的意義。

識我的學生及朋友們，都知道我係一個好怕悶的人，滿腦子鬼主意，就是想令事情變得有趣。身邊活到中年的朋友，大多都感到生活苦悶，每日重複做相同的事，聚會中最常傾的哲學話題是：人生的意義。我認為生存最大的目的，就是要令自己每日過得不委屈，做到自己想做的事情，盡量令自己開心。每次講到呢度，總有好友回應一句「有錢有選擇，有錢有自由。冇錢，要為生活，何來講享受。」其實有錢冇錢，你都有選擇的權利。問題是，你個腦能否靈活地想出另一條有變化的路。教書，在別人眼中是一份很沉悶的工作，班房內見的，堂上講的，都離不開是重複又重複的人及內容。既然係咁，我就用輕鬆教學法，自己教得開心，學生上堂學英文又易入腦。有日當我連行入班房都覺得是苦悶時，我轉去義教，試一試唔收學費、改變上課環境、亦改變教學模式，看看會否更刺激，更精彩。住在香港幾十年，有時亦覺得沉悶，所以我鍾意周圍走。去旅行，去四日唔夠，我就試吓住夠三個月。行獅子山，行到悶，就再發掘新路線，往不同的山頭去闖闖。食自助餐，唔想悶，今日西式、聽日日式、後日韓式。曾經有一段時間我好鍾意揸車，為咗令自己更開心，換車的頻率相當高。直至有一日我連揸車都開始覺得悶，就索性唔好揸，改搭巴士、地鐵、小巴。我自己都估唔到，原來坐巴士上層慢慢地看著風景，比起自己揸住私家車在司機位快看的，更廣闊，更美麗。抱着這種心態，令每天的我都像在放假一樣，心情大好。朋友，如果你時常覺得苦悶，不妨找一些東西來轉一轉、換一換，用另一方法過活，另一角度睇事物，你或許會更快樂。講到呢度，身邊有個人怒啤著：「咁你同我一齊會唔會都覺得悶？又想再來轉一轉？」我的答覆是：「放心，到這刻為止，在這世上，能配合及容許我過着精彩人生的，唯獨是你，OK？ Happy 6th Anniversary!」 2019年5月6日

《爭玩具》

主角：10歲表姐，6歲表妹，4歲細表妹
案發地點：表姐屋企
兇器：公主城堡Lego

主角：10歲表姐，6歲表妹，4歲細表妹案發地點：表姐屋企兇器：公主城堡Lego 三人混戰搶公主，各有招數。權威10歲妹：「喂，係我ga，你哋唔掂，No！」純情6歲妹：「但係我又想玩喎，share啦。媽咪，表姐唔肯share呀。」野蠻4歲妹，唔洗講嘢，用武力解決，力搶，批踭，腳踢，牙咬。民主姨媽出場：「你係表姐，大個啦，唔好同表妹爭玩具啦。大蝦細，被屎餵呀。」（嘩，前衛輝出場咩，呢句好「娘」。何解大一定要讓細先？孔子《論語》有講？又曾幾何時唔讓嗰位要被迫食屎呀？《東張西望》有播？）豪爽阿姨出場：「媽咪聽日買過一盒比你哋啦，唔洗爭。」（聽日還聽日，爭輸最核突。今天的事今天做。做人要活在當下。來抱緊這分鐘。） 3隻惡豬仍混戰中，從來只講唔做嘅低頭族姨丈：「再爭我就打，邊個想打？」（魚腸，你都係繼續打你嘅機罷啦，現場冇人驚過lor……） Mia忍唔住出招：小朋友，邊個想擁有盒lego？（3個一齊舉手，我我我！）咁邊個想享有盒lego？（靜咗2秒，你眼望我眼，然後又「我我我」）點呀？究竟想「擁有」定「享有」ga？（靜晒……）我就唔想「擁有」喇，我寧願「享有」。Mia唔想「擁有」一間酒店，因為要好辛苦搵好多錢先或者有機會買到一間酒店，啲時間用晒嚟搵錢，咪冇時間同屋企人/朋友玩lor。但我可以好自在咁「享用」佢，行入lobby涼冷氣坐梳化又得，借個toilet痾個靚尿又得，book個buffet食番餐勁嘅只係幾百蚊亦得，想住一晚都係有限錢。享用完呢間酒店，悶悶哋下星期又試下另一間又得。咁「擁有」嚟做乜？好威水又點？唔及我可以自由低成本「享用」唔同酒店咁爽喎。你要搵幾億嚟起個大商場呀？辛苦晒～我唔洗錢可以行商場，鍾意咪買杯雪糕，唔洗＄100。零壓力，無難度。小朋友，有咩嘢係唔一定要「擁有」，只要「享有」就夠ga啦？冷氣機！（無錯，你老豆擁有，你就享有。） MIA！（無錯，我愛人擁有，你就享用我同你玩嘅時間就已經好開心啦。）底褲！（滴汗……呢樣唔得喎，唔可以享用人地嗰條底褲ga，唔衞生ga。）曱甴！（開始亂嚟…………Mia唔享用喇，留俾你擁有啦。）之後數咗幾十樣「無厘啦更」嘅嘢（poo-poo、wee-wee、工人姐姐、Peppa Pig，etc.）完全忘記咗10分鐘前被爭到裙都甩埋嗰位lego公主。夜喇，走喇！邊個「擁有」盒lego嘅請tidy up，邊個只係「享用過」嘅請講聲「Thank you for sharing」，然後同我著鞋，落街食雪糕～～Yeah～＃愛情一樣，壞男人，唔需要「擁有」，「享有」佢對你嘅思念就夠＃錢都一樣，唔洗「擁有」到死嗰刻都洗唔晒，只需適當地「享用」佢為你帶來想要嘅生活就夠 2018年6月17日

《補習的幽默，妙問又妙答》

朋友眼中的Mia，除了是英文科補習天后外，還是一個率直幽默的中女。有多幽默? 何解要幽默? 或許有人想知道，如何可令沉悶的英文變得有趣。其實語言本身就是複雜的，規矩多多，變化多端。若能以幽默輕鬆的方法來教授複雜的理論，學生必是受惠者。

朋友眼中的Mia，除了是英文科補習天后外，還是一個率直幽默的中女。有多幽默? 何解要幽默? 或許有人想知道，如何可令沉悶的英文變得有趣。其實語言本身就是複雜的，規矩多多，變化多端。若能以幽默輕鬆的方法來教授複雜的理論，學生必是受惠者。在班房裡經常「搞爛gag」的導師，究竟是他固意安排每10分鐘必一「gag」來喚醒快將沈睡的學生，或是他本身就是一個懂得製造輕鬆氣氛的好傢伙? 我不太完全清楚別的導師的做法, 但我可以坦白告訴你, 我兩者皆是。曾經有學生e-mail問我可否開一個說話技巧課程，他想學習看透人心的問話術、幽默風趣的演講技巧等。說實，我沒有報讀過任何一個類似的課程，閱讀經驗多但甚少觸及這個範疇的書籍。說到底，我是無師自通，這點或多或少與個人性格有關吧。從少到大我都是一位「問題少女」，跟我一起的朋友或男朋友無一幸免，我就是愛「打爛沙盤問到篤」，問到你煩，問到你解答不了為止。有些善心人士施於褒詞：「妳真可愛」。當然貶詞我也聽過不少：「妳…妳都幾煩喎」。亦都有些冷笑黨，二話不說轉頭離去，心在想著「我睇你唔到…我聽你唔到…」Anyway，無論你怎樣看待我，我也得要問下去，直至世界末日，海枯石爛。你能擁有多少知識，就看你的求知慾有多大。我也常鼓勵學生多發問，就像我一樣，通過「發問」，你便知道更多更多。人云：「路在口邊」，都是同一道理而已。我的幽默及有說服力的演講，極大原因就是來自我過去幾十年的發問、觀察及聆聽吧。同一個問題，不同人有著不同看法，而大多答案都是很「搞笑」的。我曾問身邊的朋友：「為甚麼小時候要讀古文? 知道歷史有何用? 屈原是誰又與我何干?」正路的回答是:「我們是中國人，對歷史理應略懂一二」。但也有人答：「因屈原的死很有意義, 他願意用自己性命來換取我們今天有的端午節公眾假期。加上沒屈原便沒糭吃，海皇粥店便賣少一種食物了。因此，我們應要知道他是誰，亦要好好尊敬他」……你臉上出現三條黑線了嗎? 知識及笑料同樣都可以從集思廣益得來的。你與別人交談時的話題夠多變化，回應別人的提問時不再極為無聊低能，有助提升個人自信呀。我愛我的堅持，我愛不斷發問、不斷學習。早前我學習玄學術數，師父聽過我的無盡問題後，沒讚我可愛、沒說我是煩人，亦沒橫來一眼冷笑置之。反而，他學懂了「反問我的發問，問完再反問，答完再反問」。我遇到對手了，但我倒是欣賞這樣的課堂，師生互相啟發，各自受惠。同學，儲起了一大堆問題沒有? 我等待接招。 2014年某日

《咁先叫勁》

又到1月啦…又要為下一年嘅promotion而去影批靚相嘅時候啦…如果你已經補咗我好幾年, 你應該見證住「Mia的青春流逝過程」…唉…

又到1月啦…又要為下一年嘅promotion而去影批靚相嘅時候啦…如果你已經補咗我好幾年, 你應該見證住「Mia的青春流逝過程」…唉…究竟依幾年嘅promotion photos, 越來越影得好定係越來越差呢???? 依條問題, 我一定唔會問口臭嘅人, 否則只會自討苦吃, 比佢地狠批至一文不值, 觸怒娘娘我呀~ 眼見身邊好友, 先剛剛30歲, 但個樣殘到好似就快要老死咁, 我真係唔想好似佢地咁。點解女人個樣可以咁殘呢?? 最近我搵到原因啦, 好大程度上同「心境」有關的。講你知, 有自信嘅人, 真係靚過人、威水過人、做咩都成功過人嘅。有次我同個朋友喺IFC shopping, 行到好倦, 搵間餐廳飲杯嘢先。Settle 好之後, 人有3急, 我去個靚廁先~ 返黎嘅時候, 見到有個貌似菲傭嘅waitress 走埋去我枱, 同我個朋友講咗一大堆英文問佢想食咩。我見我個friend個樣, 眉頭皺埋一堆, 左面咀角向上戚, 面容扭曲, 何其樣衰。我再望望周圍嘅人嘅目光, 眼啤啤, 個個都好想講:「聽唔明英文就唔好入依啲高級餐廳啦!」其實我見到我個friend個樣, 我都覺得佢好慘, 要硬食依啲令佢超尷尬嘅場面。就算佢平時幾靚女都好, 個下面容扭曲已可令哀家扣佢80分! 我一坐番底, 儀態萬千咁先慢慢將左腳翹起搭住右腳, 再將餐巾輕輕放喺大脾上, 腰再挺直, 挺胸收腹, 頭向右面微微升起40度角, 加個有力嘅眼神望住 waitress, 擺出一個慈祥得有如觀音大使嘅含笑, 向佢微微點頭, 用右手手指公輕輕托托我尖尖嘅下巴, 亳無壓力地爆左一堆超流利嘅英文出嚟order嘢食。真係唔係讚自己, 雖然真係讚緊自己, 哈, 喺果刻, 我覺得好似有支大光燈照住我個人咁, 旁邊兩枱嘅食客一齊擰個頭嚟「裝裝」我係乜水。有一枱3個疑似闊太嘅女人, 在投以羨慕目光; 另一枱有一對疑似夫婦, 個老公都襯老婆唔為意時偷望咗我一嘢。成程tea time, 我好肯定咁講句, 即使我未必係全場最靚嘅一個, 至少我會係全場最有「自信美」嘅一個。所以話呢, 讀得書多, 學識多, 英文叻, 幾時都係咁有著數。各位, 真係要練好啲英文呀~ 我識得個朋友, 佢喺「連卡x」做售貨員。有次我問佢: 「你成日都見到咁多闊太、有錢嘅大媽嚟買衫買鞋, 其實你羨唔羨慕佢地日日好似唔洗撈, 但又大把錢洗咁呢?」佢嘅答案, 又確係有意思~ 「吓? 羨慕佢地? 初初做依行嘅時候就會嘅, 但做耐咗, 見嘅人多咗, 我就覺得冇咩好羨慕。通常真係超有錢個啲闊太, 好多都好靚嘅, 但同佢地傾多兩句, 就知佢地都係洗老公錢, 好多都係有教養, 但唔多學識。有時用單字嘅英文, 佢地都會叫我 pardon。佢地威水, 都只不過係威在「有個有錢人娶咗我」, 自己又唔見得有啲咩長處好令我去羨慕喎。反而, 有啲事業型嘅女性嚟買嘢買得好豪個啲, 我就會羨慕啦。揀衫揀鞋時, 好明顯係有taste。洗「自己用才華搵番嚟」嘅錢, 個樣都唔同啲, 好似有種好強嘅正能量由佢地個身度飄出嚟咁架。」嘩, 一個售貨員可以睇到咁多嘢, 仲可以咁仔細分析?! 由此可見, 身邊嘅每一個人, 目光可能都係同一樣: 只有有學識、有內涵、有骨氣、自己洗自己錢的, 先最令人尊重。身在幸福富裕家庭嘅你, 唔好再諗靠屋企養一世, 自己就讀書求求其其, 做咩都「hea hea」咁呀~ 想真正令人敬仰, 係要靠自己嘅努力架!!!!!加油!!! 201１年某日

《死都要比較》

「人比人，比死人」這句話有點老土，但又永恆是正確的。無論你是1歲或是80歲，總愛同人比較，或「被比較」。睇睇我身邊的奇人趣事吧：

「人比人，比死人」這句話有點老土，但又永恆是正確的。無論你是1歲或是80歲，總愛同人比較，或「被比較」。睇睇我身邊的奇人趣事吧： 1）受害者1號乃是1歲男嬰。爸爸問我：「係唔係BB食奶粉會大隻啲？我嗰friend個仔好肥、好大隻、好得意。但我嗰B好鬼細粒，我怕佢第日唔夠人『揪』，都叫我老婆唔好再畀佢食人奶，又唔聽，又話『有免費嘢唔食走去食貴嘢』，好鬼煩！」爸爸呀爸爸，你生個仔出嚟係為咗第日同人隻揪的嗎？你嗰仔係唔肥，但唔係瘦到營養不良又有病，你咁都要擔心一番，係你自己有病就真。講到尾，你唔係怕個仔太細粒第日俾人蝦，而係怕佢唔夠肥令你「冇面」啫，對嗎？ 2）受害者2號，1.5歲女嬰。媽媽叫BB同Auntie Mia講「Goodbye」。BB好乖，興奮地對我講「仆街」。媽媽極唔好意思講：「死啦，佢連Goodbye都講唔正，第日我怕佢啲英文會差過同學，讀唔到書升唔到大學，搵唔到份好工又搵唔到個好老公。可唔可以book定你幫佢補習？」媽媽呀媽媽，BB今日講唔正「Goodbye」，唔等於佢中六考DSE時會對住考官講「仆街」的。人每日會不斷進步，你咁早睇死個女第日讀唔成書？唔好畀自己咁大壓力啦。 3）受害者3號，6歲小一的女孩。媽媽向我訴苦：「Mia，我個女第一次中文讀默都有85分，今次得5分，好大鑊。佢仲要好惡咁同我講：『老師話你一定要簽名㗎，唔簽的話後果會非常嚴重㗎。』佢完全冇悔意！上次85分老師已經打電話畀我，話佢缺乏默書技巧，今次得5分我直情冇面帶佢返學。」媽媽呀媽媽，幫我一個忙，我想認識那位老師，想向佢請教一下係咪每個學生都要拎100分先叫做「好學生」？85分都要被訓話？嗰個老師當年讀書又係咪每次都拎100分先成就到佢今日做老師嘅夢想？要學生拎100分唔應該係佢教學嘅目標，反而鼓勵學生要不斷進步、再創高峰，先可令佢喺教學上得到最大嘅滿足感啊。 4）受害者4號，17歲的中五學生。我問：「點解你要嚟上補習班？」佢答：「我好憎同班考第二嗰個同學，成日得得戚戚，想打巴佢。我立志要考得好過佢，所以搵補習。不過我已經補過幾個老師，英文都仲係好屎。好sad。」同學呀同學，從前海洋上有一個小浪，佢同大浪講：「你就好啦，咁大又咁高，我就弱雞到爆，so sad。」大浪安慰小浪：「唓！我同你一陣跌返落去，咪大家都係水，有咩分別？我都係靠頭先架大船行過我先有機會升得咁高啫，有咩好羨慕。」咪係囉，佢考第二，你考第二十，你同佢都係人，都係學生。今次佢考第二，可能因為遇到良師指點，推佢一把。而你今次考二十，唔代表永遠都係二十，當你又遇到貴人扶持，自己又出點力，下一個考第二嗰個咪係你囉。而嗰個「貴人」，咪就係「我」囉！ 5）「自」害者5號，80歲的伯伯。有日我去酒樓嘆茶時，聽到隔離枱個伯伯叮囑個仔：「你要幫我訂定最好嘅棺木，要靚過你二叔嗰副，等我落到去可以繼續威比佢睇。我出殯嗰日，你唔好馬馬虎虎呀，我睇實你㗎！整豪啲，幫我請個人嚟破地獄，搵個專業啲㗎，幾錢都無所謂，唔好求其跳呀，比人笑我寒酸我返嚟摙死你。燒多啲金銀衣紙比我，有錢使得鬼推磨，我落到去都要收買吓啲鬼差。一定要燒大屋、靚車、iPhone、保鑣、司機、工人……」當一個人「要面」要到做鬼都唔放過，你可以想像到佢過去80年來生活壓力何其大。善哉善哉！ 2018年11月14日

《百世修來同渡船，千世修來共枕眠》

如果要一百世的修行先可以令到兩個人有緣喺今世搭同一架車, 要一千世的修行先可以令你同佢成為夫婦, 咁我同你究竟修行咗幾多世, 結緣咗幾多世, 今世先會喺同一個班房相遇呢?

如果要一百世的修行先可以令到兩個人有緣喺今世搭同一架車, 要一千世的修行先可以令你同佢成為夫婦, 咁我同你究竟修行咗幾多世, 結緣咗幾多世, 今世先會喺同一個班房相遇呢? 依個introduction夠唔夠浪漫? 哈~ 人生在世, 實在有太多嘢可以諗, 太多嘢可以做, 太多嘢可以令你的人生充實。我就是這麼的一個人, 喜歡思考, 無論思考的內容係有意義或是係無聊至極, 我都愛諗一餐。可能就係因為咁, 所以我一啲都唔悶, 又多鬼主意。今期好想同你地分享一下我的人生哲學, 不論你同意與否, 我就是愛分享, 我愛我擁有的言論自由。你覺得點樣先可以令自己最快樂? 有勁多錢洗? 搵到相愛的對象? 食到好味的美食? 唔洗讀書每日勁瞓最少12個鐘? 曾幾何時, 以上全部都是我所想。我一直都以為只要做到以上其中一樣, 已經好快樂, 再冇他求。但人越大, 擁有的物質生活越多, 經歷的喜與悲越多時, 才會開始發覺, 原來真正能令我快樂的是「不想一個獨自快樂」。一隻龍蝦, 與其叫我一個食晒, 我寧願請幾個朋友, 一人食一啲。分享到的除了是美食, 還有歡樂。所以我平時最愛大宴親朋, 親自下廚整幾味, 當我見到人地食我煮的美食而露出發自內心的笑容時, 我明白到與人「分享」的喜悅, 所以我亦愛結交朋友。一間５千萬大屋, 我一個人住會開心嗎? 我不要獨自快樂, 我寧願住一間８00萬的, 再拎剩餘的４２00萬做其他令別人快樂的事。捐比有需要的人? 見到冬天凍到不願落床的公公婆婆有多條頸巾用, 我更開心; 見到山區的小朋友有多支筆多張紙寫吓畫吓, 我更身心滿足; 見到街上的流浪貓狗有啖飯食吓, 有瓦遮頭, 我更快樂。錢帶不到棺材, 夠用夠維持生活的, 其實已滿足。說實的, 物質帶給我的滿足遠遠不及心靈上的滿足。我非常明白自己選擇教書這條路是沒錯的, 因我就是喜歡「分享」。你可能都會留意到喺教書枱上的Mia, 經常眉飛色舞, 講書講到忘形, 進入hyper狀態。如果你覺得我係「扮」出來, 咁我要多謝你欣賞我那份無比毅力, 一連365天都要在「扮」的毅力。若非我鍾意同人分享我的知識、分享我的人生經歷, 分享我的生活哲學, 我怎能現在教好每一堂? 知識是無窮無盡, 我能夠把我所學所知道的, 有緣在同一班房內與你「分享」, 是我今生最要感恩的事。上帝或佛陀, 如果他日Mia一時行錯路，犯了不可寬恕的罪, 你可選擇以「封了我的咀」為懲罰, 因這是我最最最最覺得痛苦的事。 2012年某日

《邊個寂寞．你寂寞》

「你一定好寂寞！」凌晨一點WhatsApp彈出前男友的訊息。由於N年沒見，為了確認訊息不是來自KK園區，我準備了幾條刁鑽問題以核實身份。

「你一定好寂寞！」凌晨一點WhatsApp彈出前男友的訊息。由於N年沒見，為了確認訊息不是來自KK園區，我準備了幾條刁鑽問題以核實身份。「我腳板底有幾多粒墨？」「被馬騮騎上個頭度結果搞到PK，係邊一年？」通通答對，PASS！「係你呀，陳生，何以見得我好寂寞？」「到而家都未結婚，又冇仔女，孤獨女人，有得幾開心吖」突然感到有一股神光，由天靈蓋直入，整個人醒了，證明當年分手的決定是「最好的安排」。身邊總有一些人，單一思維，「我執」極重，自以為是，覺得自己係世一，所有答案都是對的。難道我當日嫁給陳生你，生堆陳子陳孫，就一定是幸福開心女人嗎？「有錢人一定開心」成日怕身邊有賊，謀財害命，豬朋狗友一大堆，擔心還是開心？「肥人一定冇人鍾意」君不見「香港最受歡迎女歌手」是誰？「全球暖化一定關人為製造碳排放事」地球每一千年就有一個自然的溫度升降定律，不可能嗎？「你阿媽一定是女人」這個。。。對，對！如果你是人類。。。就算人死了，都有不同講法：「人死如燈滅」「睡覺等審判日來臨」「進入中陰身待往生六道中」陳生，世界之大，可能性何其多，不要執着「自己永遠是對」的想法。人人對生命睇法不同，選擇自己認為開心的道路，你為何要一一干涉？為何要別人行一條「你認為幸福」的路？ By the way，你那麼夜text我，究竟邊個寂寞？ #你身邊有冇呢種陳生 #放下我執 #尊重不同意見 #邊個幸福我幸福 2023年7月10日

《終生學習》

Hey~ 今年2017，有件事我好期待，就係去旅行！！！去旅行呀！！！喂，我要去旅行呀！！！＜──癲左……

在下Mia，未請教

在下Mia，未請教

Miawong.hk

課程查詢熱線: WhatsApp 6886 0600