《你的運氣如何？》

上個月堂上我分享過一則事件，話有個朋友想自殺，我勸佢唔好，因為師父教落，人的大運每10年就轉一次，今日的衰運，總有一日會過去的，先捱一捱，過咗就有好日子過。相反今日好好運，就唔應該曬命，做事留一線，日後好相見，否則第日轉番個衰運，被你曾經睇唔起的朋友一定會恥笑你當日的曬命，一句二句「抵你死，豬頭炳」就會橫飛出嚟攻陷你。平時教英文都唔見大家咁留心，一講到命運風水命理大家緊張到呢，直頭想我講足一堂。所以今日就打篇稿同大家share一下吧。

先講下點解我會識風水批命先，其實係源於我嘅「8卦 + 無比好奇 + 唔鍾意俾人呃」。事緣我十幾歲時，我呀媽已經成日帶我去睇相，批命。有個師父同我呀媽講，第日你個女一定有一個好錫佢嘅伴侶。我心諗，一係錫，一係唔錫，你中嘅機會係2份1，都好大下喎。如果第日你唔中，我可唔可以搵番你回水。第日又即係幾時？我60歲時先發覺我搵唔到個錫我嘅伴侶，到時師父你都仙遊左，想搵你回水都唔得啦。總結：你講晒啦，神棍！但我呀媽聽到師父勁讚個囡條命生得好，開心到見牙唔見眼，大大封利是俾得幾爽手呀。

由於我好唔鍾意「被人呃」嘅感覺，為咗唔被人呃，我決定自己學風水命理，學咗佢就知依套嘢係堅定流。堅嘅話，以後唔洗每年走去黃大仙問路，因我自己就係「Wong大仙」。如果係流嘅，依世都唔洗信，信自己就可以了。我從來都唔迷信，因我只信make sense嘅道理。咩叫唔make sense？例如有個玄學家話：「做教書嘅人，屋企一定要放多幾樽鹽，因為『樽鹽．樽鹽。尊嚴．尊嚴。』仲一定要打直放，唔好倒晒啲尊嚴，如果唔係啲學生就唔聽教㗎啦！」。。。聽完後，簡直汗都滴埋，如果我信，我覺得自己同無知嘅師奶冇咩分別。所以我一直以嚟，只相信某啲玄學concept。相信你地最緊張，最想知嘅，應該係點樣「開運」！當然啦，人人都想好運啲，做事都得心應手順利啲。以下就係我多年嚟嘅開運心得，同大家開心share下：

1） 笑多啲
正所謂「相由心生」，你笑多啲，你個樣會好睇咗，靚仔靚女左，自然好嘅桃花都多咗，大大增加你搵到真命天子嘅機會。加上，你笑多啲，身邊嘅人自然會覺得見到你自己都開心埋，就會成日想見你，想搵你，想同你傾計，你朋友都多啲。當你唔識做功課時，你試下笑咪咪咁同你同學講：「可唔可以借嚟抄呀？呀唔係，可唔可以教我點做呀？求下你吖，靚仔。」對方拒絕你嘅機會比起你口黑面黑咁講應該大大減少。又正如，落堂後你出嚟問我嘢，如果我擺一個「覺得你好煩好蠢」嘅咀臉，你都唔夠膽問我嘢啦。所以你見唔見我每次未聽到你問乜，我就對咗你笑先？等你問我嘢時唔洗咁緊張，唔識問到識，你智慧增張有得益，我又心情愉快答得開心，雙贏，幾好呀～

日本曾經有個科學家做咗個實驗，佢將一個番茄切開咗一半，放咗落兩杯水度。然後拎住左面果杯，每日爆粗勁鬧佢，對住右面個杯又每日讚佢正讚佢好，結果一星期後，佢發現每日比佢鬧爆果杯水裡面個番茄爛得好緊要，但比佢日讚夜讚果杯水裡面嘅番茄，竟然仲係咁新鮮！佢証明咗水係有正能量同負能量之分，而人體內有70％係水，即係如果你每朝起身都對住塊鏡講：「你真係好靚，好吸引，好順眼，好好運」，講多啲，你身體會作出正能量嘅反應，你個人都精神啲，健康啲，上堂集中啲，成個人脫胎換骨，好運自然來啦～

2）多啲幫人
我問我個朋友，你今年做咗善事捐咗錢幫人未？佢每次都答：「我就係需要人捐錢俾我果個，你今年捐咗錢俾我未呀？」激死！信我啦，你幫咗人，你仲開心過被人幫，唔係咩叫「施比受更有福」。我嘅親身經歷就係，有一年公司邀請我做義工，義務帶啲盲人去青海。初時我諗「果段時間係summer course宣傳期，去左青海咪影響咗summer course收生！加上，果啲係視障人士，即係我每日要照顧佢地，咪好辛苦」。但係我又未去過青海，都有啲想去，好啦，當幫下人，就去啦。

初初幾日，我帶住佢地行，每餐夾餸俾佢地食，去到酒店又幫佢地拉行李上房，差不多係全職呀四，咩都服侍周到，差在未洗同佢地去toilet拎埋廁紙幫佢地x埋。佢地又好有禮貌嘅，唔該前唔該後，睇佢地旅遊果幾日鬼死咁開心，我直情覺得自己係佢地嘅大恩人啦。我辛苦咗咁多日，照計我應該好愁好慘，出奇地，又唔係喎，我覺得我好開心喎，見到佢地好開心我又好開心喎。原來幫左人，最開心果個唔係對方，係自己。所以我依家都一直留係班房，拯救幫助一班無知識的小兒童……

如果你都想每日心情愉快好運來，由2017年開始，不如就多啲幫人，多啲笑啦，試一試，世界更美妙。
2017年2月某日