《別了，我的S6學生》

教書生涯已到第17個年頭，每年總經歷一次要同S6同學say byebye的難離難捨的時刻。上S6最後一堂Live班，佢地啲樣好似想喊咁。而其實真係試過有一次有位同學一路上堂一路眼濕濕。佢由S1開始補我補到S6，每個星期上Live都會早1個鐘排隊，因為佢要坐第1行喎，要坐正喺我面前，話要睇清楚我個樣喎。到咗last day嗰堂，佢一入到班房就開始用tissue索眼淚。我問佢，你做咩咁sad，雖然係last day，但我都未死，你唔好好似去咗我個喪禮咁啦。佢話，每個星期六嚟上你堂，都係我每星期最期待嘅節目，以後都唔可以再嚟，我會生無可戀，我會好掛住你。。。

初初幾年教書，一到last day，我都會有啲sad，因為當時未有Facebook/Instagram/Snapchat，若然要last day，以後真係好大機會唔會再見，係真正嘅cut contact！所以好多好多學生會落咗堂輪流出嚟同我影相留念，又攬又錫。但依家時代唔同咗，又Facebook又Instagram又email，其實要再約番見面都易咗好多，我就冇以前真係咁覺得唏噓嘅～ 加上，每年都總會遇到一次依啲咁嘅情況，可能我都已經習慣左了。學佛家所講，要懂得放下，心境先會開朗～唔通我話，我都會好唔捨得你地㗎，不如你地出年再補我啦，好嗎？？ 依啲詛咒人地repeat嘅說話我係講唔出的，更加唔會咁諗啦～

有時我會諗，你地依刻就話會唔捨得我姐，過咗幾年後都唔知仲記唔記得我係乜水。情況就好似你要我諗番起2x年前教過我嘅所有中學老師，坦白講，我真係記唔晒佢地啲樣同名，只係記得某1-2個，因為佢地影響得我最深。

我嘅中學時期，喺日校教過我嘅英文老師我諗有5-6個，但我只記得Ｓ6-7的Miss Leung。我記得我好多時一有英文難題，就會放學去教員室搵佢。有好幾次，我問佢英文嘢，佢唔識答。其實我接受老師唔係所有嘢都識，因老師唔係神仙，唔係字典，唔係百科全書，唔識有乜咁奇，就正如當時嘅孔子都未必知有太陽系一樣。但我最唔like有啲老師明明自己唔識，就老作同學生講「英文冇依樣嘢／英文唔會咁用lor，冇得解，總之就唔會lor」。

我like Miss Leung，因為佢真係會認真聆聽同思考我問嘅問題，佢會用心去諗點解我會唔識，點解我會理解唔到，係因為我stupid？定係佢講解得唔清楚呢？佢會從中學習再反省，令佢下次再教書時識得搵另一個更好的方法去教好學生。有時我問到佢某啲英文用法，佢都唔識時，佢唔會hea我，反而認真去搵資料，解答我問題。而每次最後能夠成功解答我問題，佢都會露出滿足嘅笑容，同我講番thank you。以前我諗，唔係應該我同佢講thank you咩？依家到我做人老師，我完全明白當日Miss Leung的心情：無嘢開心得過智慧日增，不斷進步。

當日老師用心教導，我係真心feel到的。極可能就係因為佢，影響到我依家教書嘅心態。我從來都唔會比自己hea教，如果有某堂我教得好差，我會食唔落晚飯，成晚訓唔著覺得好內疚。曾經我有個都係教書嘅男友同我講「車，你知你自己教得唔好姐，啲學生傻吓傻吓咁，佢地點知你教得差姐。」依句真係好反感，我完全唔buy，最後因同佢性格不合分開左。好多時，呃到人呃唔到自己，良心依啲野，天知地知。要問心無愧，先可以每日快樂地做人。所以我成日同自己講「Mia，盡力做到最好吧，唔好令人失望！」

直到今日，見到學生寫感謝信俾我，話「你係一個好用心嘅老師，我feel到你嘅教學熱誠」，我都好想同Miss Leung講句多謝。人地成日話「教書係一項用生命影響生命嘅工作」，我好同意。遇到良師，應該感恩，因為上天並沒有公平地安排每一個人一生中都必定出現一個恩師，若然你有幸遇到，就應該珍惜。我唔肯定我可以影響到你幾多，但至少我有盡力過，努力過。希望你地日後做每事時都放個心去做，盡力做到最好。經驗話俾我知，用咗心，做每事成功嘅機會都好大。但如用咗心，都係做唔好，就同你嘅個人能力有關，無須自責，再努力改善，希望下次做得更好。
2018年某日