《愛上澳洲》

剛剛的農曆新年假期，Mia去了澳洲旅行。每次的旅行都令我對人生嘅睇法有所改變，而今次嘅改變都幾大，不得不在此同大家開心share一下。

十幾年前自我升上大學開始，我就鍾意旅行，因為我鍾意睇新鮮嘅事物，令到自己同人溝通時多d話題，人緣都好d；我鍾意認識唔同文化背景嘅陌生人，因為每個人嘅人生經歷唔同，每次聽到人地講佢地嘅生活趣事，都覺得好搞笑好特別；我鍾意食新奇嘅嘢食，喺香港生活已幾十年，唔同菜式都試過，但外國的烹調技巧同風味都唔同，正如一杯coffee，你坐係茶餐廳飲，同坐係Starbucks飲，感受都唔同；而最重要的是，我鍾意去旅行因為面對面嘅人大部份都唔識我，我可以盡情享受自在。我試過喺香港一間酒店食西餐，當晚我同我男友打算食個romantic嘅燭光晚餐celebrate拍拖5週年。Waiter行到我枱serve我地時，佢第一句就話：「Ｅ，Mia！我係你學生呀，以前Ｆ６補你，你同男朋友撐枱腳呀（奸笑look）」每當我同男友傾密計時，佢就有意冇意過嚟fill水，其實係偷聽！本身諗住食一個relaxing dinner，就係因為遇到八卦嘅舊學生而破壞咗。不過又冇計啦，我都教左十幾年書，數落上過我堂嘅學生都多過10萬，生活喺香港好難避免，但喺外國就唔同，100％做番自己，難怪藝人都咁like去旅行relax一下～

唔同年紀去旅行，感受都唔同。20歲去旅行，冇乜錢，去到外地唔會搭taxi，唔會住貴酒店，唔會有太多shopping，主要以觀光為主，由於仲係黃毛小子，見識少，去到唔同地方唔會有太多反思，去唔同景點影下相就算，回到香港又繼續之前嘅生活，從旅行中得到嘅得著比較少，只當有幾日娛樂，話俾人知去過邊度邊度，好似好巴閉咁～

30歲去旅行，做工賺到錢，可以去得豪d～ 住5星級酒店，食當地最出名嘅美食，去最貴嘅地方massage ＆ spa，唔想行就搭taxi，幾貴都搭，買香港都未有嘅fashionable items。去旅行就好似去過皇帝嘅生活，仍然繼續影大量相，回港威威～ 有句說話叫「窮得只剩下錢」。20-30歲，每日上堂，搏到盡日教夜教，每日只在課室，對住嘅只有學生，銀行存款每日增加，但對世界嘅認知每日減少。最熟悉嘅係公開試的syllabus 同exam skills，最唔熟悉嘅係對自己好啲。身體透支得多，健康越來越差。能用錢去買個旅行，但卻買不到真正的享受。

今次去澳洲，Mia正是3X歲。近幾年開始反思，人生係咪只有搵錢？如果冇健康，冇命享，再多嘅錢都係花唔光，咁要咁辛苦為咩？所以近幾年我減少左上live班嘅數量，集中火力在家做好筆記，準備上堂用嘅講解圖片，想好如何最有效地令你地吸收更多，而減少了舟車勞頓到唔同centre上live的辛勞。再坦白問問自己嘅理想生活係點，其實我想過的，係少煩惱，少壓力的健康生活。

喺澳洲，行街都已經係一種娛樂。每家每户都有花園，行過每一間屋，都望下屋主點樣design自己嘅花園，有啲七彩繽紛有各種花，有啲清幽自在放張搖籃椅，住喺度嘅人一定每日都好relaxed。反觀喺香港，只有高樓大廈式嘅住宅，就算村屋有花園，大多都起咗高高嘅圍牆，你望多眼，屋主會覺得你想入屋爆竊。

喺澳洲街上，面對面迎來一個陌生人，只要有眼神接觸，對方都一定會同你微笑點頭，整個氣氛都係正能量。反觀喺香港，街上每個人都黑口黑面，腳步好急，個個鬥快，讓人行先好似要攞咗你條命咁，如果你冇啦啦對住陌生人笑，佢一定覺得你精神有問題，拍底你，放上YouTube，問你死味？！

喺澳洲買嘢食，每一個waiter／waitress／salesperson都一定第一句笑住同你講「Hi，How do you do？」而食客都慣常微笑回應：「Great！How are you？」野都未食，先食現場開心嘅氣氛，禮貌行先，當地人民教育做得好好。反觀喺香港，侍應黑面好常見，個個都唔想做咁，要serve食客好似係一個恩典，食客講唔該好似係責任。我相信係同家庭教育有關，家長當仔女係公主王子咁看待，依批公主王子出來社會做事又只會當客人係奴隸咁呼喝。

做人匆匆幾十年，你想住喺一個黑口黑面戒心重重嘅地方嗎？香港已經變了，回想起幾十年前，街上笑聲處處，個個以禮待人，學生尊師重道，我真的很懷念。同學，你地比我後生，要留喺香港嘅日子都應該比我多，對自己好啲吧，令自己生活得好啲，不如由你開始改變香港吧，每日笑容多一點，禮貌多一點，正能量多一點，第日你會係最大的受益者啊。
2014年某日