《愛情觀》

話說助教David剛剛過了生日大壽（11月19日），網上同堂上都有同學同佢講happy birthday，又有同學送禮物賀佢牛一，亦有同學祝佢「早日脫單」。哈，其實「單」又好，「唔單」又好，做人最緊要係開心快樂，所以我都同David講：「雖然我唔知你係有女朋友or有男朋友or冇拖友，我都祝福你日日心想事成，大吉大利！」

其實做人開唔開心，都唔一定係視乎有冇拖拍嘅，因為人人嘅夢想唔同，對所有人/事嘅排位都唔同，唔同年紀鍾意嘅嘢都唔同，唔一定要做一啲「只滿足別人期望，但又冇咗自己」嘅嘢。就好似我咁吖，15-20歲時好想拍拖，因為見到個friend有男朋友好似「好特別」咁，劇集啲男女主角拍拖拍得好romantic咁。但由10歲開始，我呀媽已經千叮萬囑唔比我讀書時拍拖，唉，冇行。。。咁佢都冇錯嘅，如果唔係我都未必有今日嘅事業成就。

到左20-30歲，我專心於做補習天后，每日連瞓嘅時間都未必夠，陪男友嘅時間當然少之有少，我呀媽又嚟千叮萬囑「呀女，唔好掛住做嘢，要分多啲時間陪男朋友，早啲嫁人好過自己教生教死吖。」吓。。。之前叫我唔好拍拖，依家催我快啲收山唔好教書，早啲嫁人。。。我老媽子真係唔太了解個女，你個女咁辛苦讀書，就係為咗之後創一番事業，咁難得做到全港數一數二嘅補習天后，你叫我退落嚟，返屋企洗衫煮飯湊仔？！No way！

到左依家30-40歲，補習天后已定型，教書事業可以話係好順利，冇咩阻滯，係時候又諗下係咪要結婚。我呀媽話：「轉死性呀你？之前叫你嫁人又唔嫁，陪班學生仲多過陪男友，個個好男仔都俾你嚇走晒，依家驚啦咩？肯嫁啦咩？」。。。

呀媽，根本唔關「轉死性」事，係人人心目中個理想timetable唔同姐。15-20歲，我視學業第一。20-30歲，一定係事業第一。30-40歲，我先開始處理愛情依part，我覺得冇問題喎，我開心咪得。如果要我為咗符合你當日俾我嘅timetable，25歲嫁咗人的話，你就happy，但我肯定今日嘅我一定冇依家咁happy自在。加上，我好清楚自己想要咩的，我一定唔會想生小朋友的，所以真係唔洗喺我當日勇闖事業嘅時候咁早結婚㗎。

唔知係唔係近朱者赤呢，我啲friends大多都係啲「好清楚自己想要咩」嘅人。朋友A，金錢第一。佢讀中學時已經成日話「第日一定要嫁個有錢人！」結果，佢28歲時嫁咗個生意人，佢坦言佢唔係好愛依個男人，但因為睇錢份上，嫁比佢生活過得舒服啲，所以揀錢唔揀真愛。旁人或會鄙視依種女人，但只要佢自願放棄真愛，又無怨無悔，咁又關你咩事呢～

朋友B，相反，真愛第一，永遠都唔覺錢係重要的。結果，35歲嫁咗俾個比較窮嘅地盤佬。作為佢嘅best friend，我成日擔心佢每日唔知夠唔夠錢過活，因佢老公欠人一身債，佢仲要幫老公還債，又要賺錢養個仔。但佢一句「I do not care~ 我愛佢，就算同佢捱，我都捱得好開心。」，咁就KO左我，冇聲出。。。

至於我，我啲表姐表哥姨媽姑姐，個個每年新年拜年都問候我：「點呀補習天后，仲未嫁人？你就快過期啦！」乜你地好擔心咩？但我好開心喎，依家拍拖，晚晚都見到我愛人，愛情事業兩得意。搞到你地咁心急, 又好似好擔心咁成日追問我，真係唔好意思。但我想講，我好自在好開心，你地唔洗擔心喎。

始終，開唔開心只有自己最清楚，想行咩路都只有自己知，希望你地都可以做一個「知自己做緊咩，知自己想要咩」嘅快樂人。至於David，大家少擔心，因為我知佢都係一個聰明人，一定識得揀適合自己的，懶理是「SHE or HE or NONE」～
2016年12月某日