《打手，有乜出奇？》

最近有同學text我：「Mia，我見到你有啲 Facebook post有人俾左嬲嬲豬emoji，我好想留言幫你鬧佢呀！」哈，同學，當然我歡迎你俾番個like我，令like同angry的比例拉遠，但你又真係冇需要動肝火去鬧爆佢嘅。網上世界嘅野，真係唔洗咁認真的。。。

我15年前入行時，未興上網，所以嚟報我課程嘅同學大部份係因為睇咗廣告或者靠口碑，人傳人，教得好就講俾朋友知，一個傳一個。幾年後，開始興上網，我見有啲網上forum專係discuss補習的，咪8卦吓click入去睇吓有冇人吓Mia Wong。初初睇冇乜感覺，後來發現有人留bad comment，好吧，先自我檢討先，可能真係自己有啲地方教得唔好，咁就積極諗下點改善吓。但之後發現左一啲奇怪嘢，點解留bad comment俾我果個人，同時用同一句comment留言俾A英文導師，但又只狂讚B英文導師呢？有日，我約咗個老行專飲茶，閒聊傾開依件怪事，佢居然同我講：「係呀Mia，果個forum我買咗的，有個英文導師出左10萬蚊請打手，我叫咗我啲打手今個月幫佢狂谷，勁讚佢，踩到其他導師一文不直，所以今個月你就慘啲啦，忍一忍啦。或者下個月你又出10萬，我幫你搶番啲學生。」聽完，汗顏。。。

要我花10萬買打手？咁「on居」嘅事我點會做吖。一嚟，我用10萬印贈書送俾我啲學生唔好？佢地可以學多啲英文。二嚟，我俾完＄仲要花時間日日上果個forum睇下啲打手有冇偷懶，不如用啲時間整下筆記/備下課/休息下唔好？三嚟，我平身不作虧心事，依啲旁門左道我唔做的，我唔想有報應。
由果日起知道咗網上充斥住打手寫假嘢之後，我就好少睇網上forum了。一直到依家，我都好少理網上comments。今期我見有同學同我講話發現我啲post突然多左嬲嬲豬，我咪8卦吓去睇吓咩人做。睇兩睇，原來唔係得我啲 post有嬲嬲豬同bad comment喎，3大補習社最出名果批老師全部都有，哈，真係當笑話咁睇。睇嚟各大補習社都用咗唔少＄喺依方面。究竟咩人喺依件事上最唔開心呢？我諗只有2種人：初入行嘅補習老師，因為佢地唔適應依個營商環境；另1種就係失敗嘅打手，一定被老闆話佢冇用，下個月冇得撈。

我同朋友當生活趣事咁share咗依件事，跟住佢地齊聲話：「係呀，依家乜都有打手！Openrice勁多，明明間餐廳勁難食，啲comment都可以話『一試難忘，正到爆』。仲有啲影評呀，套戲悶到要界櫈，啲人仲要話『緊湊刺激』。依個咩世界？」「依家網上明目張膽請打手添啦，影評＄500一個comment吖嘛，全職＄9000一個月添呀！」。。。乜依家個世界已經去到咁。。。


自從有咗網路世界後，我更加信自己，我深信自己嘅判斷力一定準確過網民講的。唔係話所有網民都造假，只不過我覺得凡事都小心啲好，免得誤信䜛言而怪錯人/做錯事。就好似補習咁吖，人地話A老師教得好，B老師教得差，點解你唔自己去試晒佢地兩個嘅堂，自己判斷邊個教得好啲呢？橫掂依家啲試堂都免費嘅，你去聽多啲/學多啲嘢又冇壞。況且，補習人夾人的，人人程度都唔同，你朋友同A老師夾唔到，唔代表A老師唔適合你嘛。


由今日起，唔好人講你就信，鍛鍊下自己嘅分析力，你應該多啲信自己。唔洗擔心Mia，我唔需要你地幫我喺網上反擊，因為留bad comment的打手根本就唔識/唔嬲Mia，只是被想賺更多錢的導師利用姐，你又無謂花精神同時間喺佢地身上吖。世上大把開心嘢等住我地去享受，一秒都唔想嘥喺依啲嘢度啊～
2016年11月某日