《純樸的Mia》

最近收到一個上咗one day free course嘅同學嘅Instagram message，忍唔住同大家分享一下：「你嘅說話內容完全同你純樸的外表不成正比」哈哈哈～ 第一次有人用「純樸」嚟形容我，通常人地只會話我「豪邁、冷酷、粗獷」。。。

我粗獷豪爽嘅性格由好細個已經開始。我有一個大我1年嘅哥哥，一個細我4年嘅細佬。細個放暑假去親啊婆屋企玩，婆婆同姑婆都會買定每人一份暑期禮物俾我地。啊哥就玩具槍，細佬就士兵坦克車模型，我就洋娃娃一個。唉，真係悲，點解要買洋娃娃，我至憎。又唔識郁，又唔識講野，我對住佢講野仲「on居」，成個思覺失調嘅傻婆咁。玩槍就唔同呢，可以扮特警「呢埋」喺啲轉角位彈出嚟講「咪郁，警察！舉高雙手，否則我打爆你個頭！」我complain過，但姑婆話女仔係要玩洋娃娃喎，激死。

我通常都要乞求我的brothers俾把槍同啲士兵我玩，佢地次次都話「死開啦！下次吖」有好幾次我要出盡腦汁先有機會掂到佢地啲玩具：嗱，我隻洋娃娃係希特拉，係賊，你地追住佢嚟打啦，係咪刺激好多先！。。。請隨便將我隻洋娃娃5馬分屍，我先有機會叫姑婆買過另一份玩具。結果下一份，又係洋娃娃，！＠＃＄％︿＆＊（）

但同一招，真係唔係成日都work，佢地嫌我隻洋娃娃唔識郁，唔夠刺激，改咗叫我扮賊，佢地追住我嚟打喎，痴根，我緊係唔制啦，結果，當然係打起上嚟。。。2男打1女，任我幾大隻幾孔武有力都輸啦。勇取失敗，唯有智取。襯佢地夜晚sleep緊，靜雞雞潛入佢地房，侵犯，侵犯佢地啲玩具！

成功偷左，當然要搵一個安全嘅地方安置佢地，放喺邊佢地先一定搵唔到呢？終於俾我諗到！界刀一把，針線一set，解剖我隻洋娃娃！先從肚腩開始，剪！然後拎晒肚腩啲毛出嚟，塞晒啲士兵坦克車同槍入去，用針線連番佢。每當夜闌人靜，月圓之夜，我就界番開洋娃娃個肚，同佢地重聚。Wahaha，wahahahaha～ （此乃變態行為，未滿18歲之學童，請由家長陪同下進行）

上到中學，我分別參加了女子籃球及女子足球隊，唔望真啲，真係以為我係男人。到讀完大學，我第一份申請嘅工作係督察！不再玩玩具槍，我要玩真槍！結果，考唔到。。。同督察冇緣了。。。

之後申請教書，我掙扎咗好耐，教日校好定教補習好呢？教日校生活穩定，但穩穩定定咁就一世，仲要教咩唔係自己揀，要跟英文科主任及學校安排的，就算覺得咁教唔work都一定要跟，加上個個miss衣著老土，大部份都要著裙似淑女，講嘢要斯斯文文，夾硬要扮依種type，唔係我style喎。結果我揀咗做補習，用咩style我話事，教得好我班學生就得，唔洗咁假扮依樣扮果樣，可以做番我自己。

試過有同學問我，「你講野咁搞笑，你本身個人係咁定係扮出嚟？」我話你知，依樣嘢係天生的，我天生就係一個樂觀兼幽默嘅人。每當大難臨頭，人人自危好煩惱嘅時候，我分外輕鬆自在。我覺得「洗死咩？」所有野，都會過去的。失戀？最多咪唔開心一頭半個月，之後遇到個新伴侶，咪又開心番，失戀唔係永恆一世嘅事。股票樓價大跌仲要失業，我啲朋友覺得世界末日咁，車，「洗死咩？」我唔信你一世都搵唔到嘢做，我就係唔信依一世啲股票同樓價都跌。依個世界萬物生生不息，所有嘢都有循環的，壞人有日可能變好人，窮人有日可能變有錢人，蠢人有日都可能變聰明人呢～

再加上，我深信學英文一定要輕鬆的。否則就算你DSE過到關，你依世啲英文都唔會有進步的。有人話，上堂每秒都抄抄抄就最充實，唔需要輕鬆，最重要緊湊。冇錯，如果你有能力不停抄抄抄但都明個老師講咩，而又吸收得晒，你講得啱的。至怕你不停抄，唔知抄咗啲咩，返屋企睇番已經唔明堂上教過啲咩，得個抄字，你點會有進步吖。你要學好一種語言，必先要愛上佢，就算唔愛，都起碼唔好憎佢。你留意下講粗口嘅人，佢地每次講時都好順口，因佢充滿自信地講，仲覺得用字擺位非常準確。相反，好憎人地講粗口嘅人，你叫佢講，一定好「甩咳」，因為佢唔愛粗口，點可以好順暢咁講呢~ 有同學學韓文好叻，因為佢愛某韓星，愛聽佢講韓文，從而愛埋韓文。

與其要我學某啲老師講嘢勁快，勁叫你抄，似一部發聲教書機器，我寧願揀番做我自己，不跟人，至少，我可以感受到教書係一份「生命影響生命」的工作，點解我要為咗賺錢而做一部發聲機器呀？我係人，我有感情，學習是一生一世的，只要能感染到你燃起學好英文嘅心，我認為我是成功的。做人，最緊要係對得住自己。我係人，佢地係唔係？你地又係唔係？
2016年9月某日