《終生學習》

Hey~ 今年2017，有件事我好期待，就係去旅行！！！去旅行呀！！！喂，我要去旅行呀！！！ ＜──癲左……
Mia渴旅行渴到癲左，係因為以前我一年平均去6次旅行㗎，短至兩日一夜，長至十幾日都有。但自上年7月入咗現代教書後，我都冇諗過會多咗咁多學生，所以就加多咗好多班，加上，話晒我初嚟現代報到，應該要上多啲 live俾啲新同學見下Mia真身嘅，咁咪唯有放棄去旅行，留喺香港陪你地奮鬥～ 但俗語所講「姣婆守唔到寡」，我見到4月啲中六同學去晒考DSE，Mia嘅中六班大功告成，叫做開始冇咁忙，真係要忙裡偷閒，襯Easter holiday出走一下放下毒，你地唔會怪我嗎？肯放下我依隻可憐嘅雀仔出去飛下嗎？Please…please…

剛完成計畫我2017年大計，首個旅行 － 去澳洲! 每年我都好鍾意為自己set下「來年大計」， 因為做人只要有目標，每一日都可以過得更積極，更有意義。學周星馳話齋，「做人冇理想，同條咸魚有咩分別？」你又有冇set個目標俾自己呀？ 2017要減10磅？2017要考頭10名？2017唔好再hea落去？ Hehe～

到咗我依個年紀，去旅行同以前好唔同，以前每次玩完返香港後，我都覺得，只不過係用咗啲時間去做一啲係香港做唔到嘅野，食咗一啲新奇嘅野，見咗一啲新奇嘅人，但最後你問我有咩特別大嘅得著，我又講唔出有啲咩驚天地泣鬼神嘅大發現。早幾年有一次去倫敦同西班牙旅行，去之前，我同自己講，做人唔可以咁hea的，去一個trip已經要花好多時間，包括事前準備工夫，去到airport等飛機，搭十幾個鐘飛機等等。唔應該花咗咁多時間之後到頭來回憶番又冇咩深刻難忘嘅事，所以今次要有大突破! 去倫敦搵威廉王子？No no no…學梁詠琪咁去西班牙搵老公？No no no…去西班牙學鬥牛？No no no…

其實係咁既，我每到一個地方，每食一餐，每聽到一個故事，每見到一個景色，每搭一種交通公具，只要同教英文有關，我都通通記低，等之後喺堂上可以同你地分享。例如，有一日我去左London一間restaurant食lunch，唔講你未必知，係London食嘢，落完order之後，平均起碼等最少30分鐘先有嘢食，所以如果你要喺London生存，一定唔可以等到最hungry果刻先去食嘢，否則會等到胃抽根…我就係坐咗喺間restaurant呆等我叫個份 Full English Breakfast。呆等實在太嘥時間，我見到table上面有個牌，上面寫咗啲字，職業病嘅我慣性咁睇下佢有冇grammar錯，hehe~ 喺香港，經常有人寫錯grammar，不足為奇。但喺英國，你唔會expect外國人都會用錯英文卦？！吖，就錯俾你睇！

你留心啲睇下有邊個位錯吖，而錯嘅位置，我喺堂上都有同你地提及過，睇下你地仲記唔記得先~ hm…點呀？洗唔洗查字典呀？ hehe~ 答案係「then」用錯。「then」唔係conjunction，唔可以用黎連接兩個verbs 「choose」同「order」。「then」係adverb，所以成句要加番「and」，變做「choose from the menu and then order and pay……」

見到有grammar錯嘅野，我又點會唔把握機會影低佢比你地睇呢~ 但我身邊嘅好友超好奇咁問我，有咩好影呀，牌一個姐。我話:「唔係呀，有grammar錯呀，我要影底佢返香港上堂時教番學生呀!」跟手佢俾咗兩個反應我。第一，佢望住個餐牌，好留心咁睇左3分鐘，佢話:「我作為一個讀緊MBA嘅碩士，我都真係睇唔到有錯喎…」我依個朋友當年A-Level考英文都考到「B」㗎，我開咗估話俾佢知答案後，佢居然話佢以前老師都冇教過，唉，依家香港嘅教育水平真係…

第二，佢話:「Mia，你依家係嚟travel，應該relax一吓，唔好成日都掛住諗工作啦，玩都玩得有壓力。」吓，我又唔覺我有壓力喎，相反，我仲覺得好正! 去旅行其中一個最大嘅優點係增廣見聞，我覺得我完全做到! 自己見識多咗之餘，喺堂上又可以教埋同學仔，都不知幾正。有幾多人可以寓工作於娛樂，寓娛樂於工作吖? 難得我搵到一份工作係我好鍾意去做，我完全唔覺得玩緊嘅時候都做一啲同教書有關嘅嘢係辛苦喎~

所以話呢，同一件事，用唔同角度去睇，得出嘅結果係唔一樣~ 就正如David咁，有同學覺得佢靚仔，亦有同學覺得佢超樣衰，大家睇法唔同姐，哈～每當我俾作文功課你地做嘅時候，有同學勁興奮，難得有補習老師可以免費幫你地改文，睇吓你地嘅學習進度，但同時間，又會有同學望住份作文功課，冇咩特別感覺，因為佢已經決定咗: 唔！會！作！ 哈~ 你問我，會唔會覺得後者好差，唔交文係懶學生呢？我會咁答:「如果唔交文嘅同學本身英文好勁，唔需要再多練習都可以寫得一手好英文，咁就可以唔洗作，留番啲時間去溫其他科吧。但如果你唔係啲咁嘅學生，就唔該請你多．加．練．習。」
2017年4月某日