《講吧！怕羞的練oral學生》

其實我係一個好systematic嘅人，做嘢好有條理，唔係話我讚自己，雖然我真係讚緊自己。每年暑期班同常規班嘅課程安排，我都一次過係6月plan好曬嚟緊全年嘅計劃。話說我以前咁多年都係喺5月臨考DSE之前開個＄440 2堂嘅練ORAL課程俾d啲S6學生練吓先去考，但上年我就決定賣大包，唔收同學學費，我做義工咁喺每日落堂後幫佢地練，為佢地呀爸呀媽慳番筆。

由上兩年10月開始，我堂堂問邊個想練就留低，但又唔係每日都有人留低，我心諗，唔通佢地覺得自己oral好okay，唔洗練？ 如果係就好啦，我可以安心由佢地上路去考oral。結果有1日，有個S6同學 Facebook inbox 我：「Mia，喺咪真係有得練 oral 呀？」「係呀，你想幾時練？」「但係我口英文好爛㗎喎，我怕你聽唔明，會鬧我。。。」唉，真係冇你地收。第一）我幫得你地練，緊係因為我知你地口英文唔好先幫，等你地可以越來越進步。如果你口英文好鬼勁，又洗乜同你地練呢？！第二）你地識咗我咁耐，我有幾何上堂鬧過你地吖？我出晒名全個補習界最 nice！就算你地有啲壞同學上堂好大聲傾計，嘈到我都聽唔到自己教乜嘅時候，我先用好溫柔嘅語氣同你地講「唔係完全唔俾你地傾，但聲線要低啲，唔好影響到其他同學聽我講書。」試問一個咁循循善誘嘅 miss，點會鬧你英文唔好呢？你英文唔夠好，我只會教，唔識教到識，唔明講到明，只有你嫌我長氣，我係唔會嫌你豬的。

喺練 oral 嘅過程中，有個學生講好少嘢，我話要有 eye contact 先俾到多啲分佢，佢死都唔敢望我，我真係忍唔住問佢「乜你好驚我咩？做咩唔望住我講呀？」佢話「係呀，我喺學校冇咁驚㗎，唔知點解我見到你就怕，可能因為我好少可咁近距離同你接觸，你喺我心目中係神，見到偶像我好緊張我諗係正常卦。」


哈，咁又係，如果宋仲基企係我面前，我相信我都會驚同緊張。但係又咁講，如果宋仲基連續7日企係我面前，我會越黎越唔緊張lor，right？情況一樣姐，你第1次對住我同其他陌生同學練，緊張係正常，但如果你第3次跟我練oral，你就會覺得好鬼平常，揮灑自如。不過如果你連第1次都唔肯，又點會有下次，點會有第3次？

話說我中學時都唔十分夠膽講英文，直至有一次，Miss Leung 話下個月有個班際英文 speech festival，每班都要派一個代表，你地每人準備3分鐘稿，下堂英文堂輪住出嚟講1次，全班投票，邊個講得最好就做代表。我放咗學，急急腳去街市買個快餸，返到屋企快快脆煮落飯，入房用咗10分鐘寫好個稿。對於我嚟講，寫英文可以好快又無難度，但對住成班人講英就真係第1次，有d「熬底」，唔得，今晚對住塊鏡講20次先！

上堂時，我發覺我望住啲同學講可能會驚，等我扮望先！咩叫「扮望」？就係表面上我係認真望住佢地講，但實際上唔係真心想望！唔好只望死1個，如果望死1個，而佢突然咀角上揚好似恥笑你咁，你就會即時俾佢影響咗心情，會變得緊張。所以你每望1個人時只keep 1-2秒，即轉下望第2個，不停轉人嚟望，唔好俾佢停，咁你就可以專心講稿，而人地又覺得你講得好自然，一啲都唔驚！如是者，我得到全班最高票數，代表我嗰班拎左個冠軍。自嗰次起，我就開始充滿自信，無論對住幾多人講野，我都唔係好驚，越練越大膽。講真，如果唔係有嗰1次勇敢嘗試，都未必有今日能夠對住好多學生演講都唔驚嘅 Mia。

凡事都有第1次，只要你過到依下恐懼，下次就會冇咁怕。信我，英文要學完靠練得多先會有大進步。答應我，行出第1步，敢於挑戰，勝出者遲早一定係你！
2017年某日