《轉會》

近期關於我最hit的news都莫過於係由《英皇教育》轉到《現代教育》了。消息公布當日，《英皇教育某些同事及已離職的前員工紛紛在WhatsApp及Facebook恭喜我「恭喜晒Mia，祝福你喺新嘅工作環境開開心心，繼續努力教好每一個學生。」旁人看，會覺得奇怪，點會有屋企人恭喜一位家庭成員離家出走成功？令我諗起一些新聞，有點似有家暴的family，哥哥替能成功逃脫變態父母的妹妹高興。

今次的轉會，驚動了很多人：同事，學生，舊學生，家人，親戚等等。有同事覺得好突然，冇諗過咁快。家人同親戚表示擔心因怕我會牽涉法律問題。最神怪的就是學生及舊學生，佢地居然替我開心。2016年1月，有學生Instagram問我是否會轉會，因Wiki上寫Mia Wong將轉會。我答，連我自己都唔知我自己將轉會，Wiki寫的是錯的，冇依回事。2016年4月，有幾個F6同學同我傾閒計嘅時候講「Mia，唔好留喺度教啦，嘥左你呀，你應該deserve有更多學生，因你真係教得好好。去《現代》啦，《遵理》都唔好呀，《現代》好呀。」我眼都突埋，我自己都冇咁詳細分析過轉會轉邊間，學生比我心水更清。2016年7月，轉左會，有舊生inbox我「Mia，我同幾個舊同學5月時討論過你，覺得你應該離開《英皇》，轉去更好的地方教，結果6月真係見你去左《現代》，我地替你開心啊！」從來冇諗過，原來有咁多同學係我背後默默討論我 + 好想我離開《英皇》。

轉了會後，有學生講我知，喺網上好多人仲傷我同David，叫我地唔好因此而傷心氣餒，佢地會繼續支持我地。哈，其實我喺依行咁多年，我當然都知網上勁多打手啦，有補習老師平均每月請打手喺網上讚自己，踩對手都要用上3萬大元。我就寧願用3萬整螢光筆同送書俾你地好過。所以我十幾年來都冇睇網上關於補習的forum，大部分內容都是流的，我只知教好每一堂，我就開心滿足，唔理人地點講都冇所謂，我好有主見，我唔會求其聽人講幾句就信或影響心情的，所以同學們可放心，我一點不開心都沒有。但我見同學咁落力share佢嘅資訊，咁我又聽下。佢話「網上d人話你貪錢所以轉會，又話你鍾意蕭源老師所以跟佢去現代喎。」聽完之後，我大笑左5秒 + 傻笑左3秒。人真係有無限幻想力，難怪d藝人都話每次睇完八卦雜誌都係得啖笑。

就教大家咩叫邏輯。因為貪錢，所以轉會。如果依個結論係正確，即係話留係《英皇》搵唔到錢啦，我搵唔到錢，即係《英皇》都搵少咗錢啦，少咗錢，即係營運將會進入困境啦，入咗困境，即係有可能做唔住啦，做唔住，最終提供唔到地方俾我教學生，咁我咪要搵另一個地方繼續教我嘅學生lor，咁我轉去另一個地方教，就係想學生可以繼續有得補，咁算唔算我貪錢所以轉會呢？第日如果你爸爸或媽媽轉工，你會否第一時間話佢「你正一貪錢精」？

至於蕭源的問題，啲學生傳我地互有愛意已經傳咗十幾年啦，仲未完。我同佢由2002年開始做同事做咗好多年啦，係好好的朋友，如果愛佢愛到發晒狂，係咪應該當日要喺佢婚禮衝入教堂大叫「我反對！狗男女！」？諗落個場面都幾搞笑，有機會成為YouTube點擊率最高之影片。

真正離開前公司轉到新公司的原因，原諒我不能100％同你地share，始終傷害到別人的，我盡量少做。但我可以好肯定同你地講，其中一個原因係因為為咗你地好，等你地可繼續見到一個開心嘅我教你地，我先作出依個決定。有咩後果，我一人承擔。我承諾你地，盡量都唔會影響到你地嘅前途，我一定會比以往更用心教學，最終受惠者，必定係你地！
2016年7月某日