《點解我啲英文咁屎？》

「點解我啲英文咁屎」，依句係唔係你地嘅心聲？姐姐唔係想打成千字去笑你地英文屎，講真，英文唔係母語，屎又有幾出奇，正如你地會唔會笑一個英國人中文屎吖？再加上，其實我以前啲英文都係屎，笑你咪即係笑番中學時期嘅我？！

話說，當年小學六年班嘅小Mia，過去六年由小一至小六都唔知自己英文叫做叻定係差，因為根本就唔知自己間小學係勁嘢定cheap嘢。廿幾年前都唔興怪獸家長，我呀爸呀媽終日喺荃灣梨木樹村街市菜檔賣菜養家，又點會知咩叫band one咩叫名校吖，求其幫我申請最近屋企果間小學咪算lor，有書讀已經ok，邊會識搞咁多嘢。考試成績中中挺挺咁啦，講真，我一直都覺得自己英文唔係最差果批。有日，我放咗學要去街市幫老豆「看檔」，有個外國人嚟菜檔買野，佢指住個冬瓜問：「Excuse me，what is this？」我老豆只有小三水平，汗都滴埋，依啲嘢當然交俾個女：「女，睇你表演！」我當刻壓力真係好大，隔離檔口豬肉榮咬住牙籤，印印腳，面露恥笑神情，心裡果句一定係「死妹丁，平時咁串咀，今次睇你點死。」對面檔鯇魚陳，一邊刨魚鳞，一邊眼啤啤等食花生。好，我一定要威番次！我指住個冬瓜講：「Hello，this is winter ball！」跟手個外國人點晒頭，笑晒咁話「Interesting！I want this please.」收左佢＄之後，豬肉榮同鯇魚陳齊聲力讚：「好嘢喎，雞腸你都掂，第日嫁鬼佬啦！」嘩，果下我幾威威豬呀，我老豆到今日事隔廿幾年都仲記得，成日係啲公園呀伯面前拎依單野出嚟認叻，講到自己個女啲英文勁過英女皇。

所以，其實我小六時都唔覺自己英文有幾差（因為身邊嘅人仲差，冬瓜明明係Winter Melon佢地都信winter ball係堅，唉。。。）去到中一，大件事！我要搬家，由荃灣搬到去屯門，由於人事關係下我就唔洗interview都入到一間當年ＢＡＮＤ ２頭（依家BＡＮＤ １）嘅中學。開學前要考個分班試，我心諗，以我依啲連同鬼婆溝通都冇咩問題嘅人才，分班試又有咩好怕。考完冇幾耐，成績出啦，中一有8班，最勁係1A班，最差係1H班。我當然由1A個list開始搵自己個大名啦，點知，1A冇，1B冇，1C冇，1D冇，個心越來越慌，繼續碌大隻眼，再翻睇1A至1D，點解真係冇嘅？！1E冇，1F冇，有冇搞錯，唔係1G下嘛。。。下！1H！。。。自信心跌至谷底。。。老師安慰我老豆「入到依間學校已經算唔差啦，之後再努啲追番冇問題嘅。」

中一至中三，雖然我都好努力追我啲英文，但溫極都唔入腦，串極都唔記得啲字。直到中四，真係開始驚，因如果中五會考考唔到，升唔到中六中七，就唔洗旨意入大學，咁我嘅人生就好灰，可能依世要踎喺個菜檔，嫁豬肉榮個仔「豬肉丸」，再生一打乳豬，而我就變埋豬乸，唉，唔敢再諗。
唔得，我一定要發圍！我用自己方法讀唔掂，我就搵一啲掂嘅人教我！結果我成功求呀爸呀媽俾我補7個英文補習老師，我唔怕日日都要辛苦補習，我最怕第日學識少俾人睇唔起！

我開咗好多本生字簿，每日補習老師同學校老師教過嘅所有野，我都用15分鐘抄一次喺我本自制notes度，抄嘅過程順便當溫埋，抄完再背一次先瞓。第1日抄左4版，用左20分鐘，然後瞓覺。第2日再抄4版，一次過溫晒8版，然後瞓覺。第3日又抄4版，一次過溫晒12版，然後瞓覺。第4日，再抄4版，雖然共16版，但完全唔洗再溫頭4版，因為連續溫左3日，已經熟到嘔。如事者，之後每晚共抄大概4版及溫12版，1個月後，成本notes共120版翻睇1次。第2個月，再開開心心去文具店買本notes，又開本新嘅，再嚟過。

慢慢，跟本就唔覺得補習係辛苦，都不知幾想去補習，識嘅野多過同班嘅同學，老師又開始讚我有進步，啲同學又開始羨慕我，我覺得自己好威。我相信任何人都鍾意聽讚美嘅聲音多過被慢罵，做任何事只要有成功感及滿足感，一定做得較起勁。我當年中四就係靠依個方法，由中期試排名200/256，最後期終試大升至100/256。中五至大學，冇英文不歡，不斷自我研究，興趣有增無減，最後成為一位有能力教好學生英文嘅補習老師。

每個人的路不同，怎樣行，你有權話事，但有一樣嘢你唔可以話事，就係時間過咗就係過咗，日後你後悔當年冇努力過，冇人會幫到你，除非你有「時光倒流神器」！珍惜今天，「勤現在，樂將來」，姐姐冇點你的～
2016年10月某日