《Mia 又被人告》
「事件已進入法律程序，無可奉告」依句說話睇電視時成日聽，睇新聞時成日見，今次到我講得最多。
2016年7月20日，幾份報紙標題都是「補習天后Mia Wong「跳槽」被英皇教育控違約索償」，Mia又一次上報紙了。我話「又一次」，睇黎我同上報都幾有緣。人生第1次上報，是10年前拍了一個古裝廣告，傳媒大為驚訝，結果我成為了香港史上第1個補習老師因拍古裝廣告而爆紅，學生人數升了6倍，更多學生認識到Mia，更多學生可接受我嘅教育，受當年的《英皇教育》垂青，負責人千方百計想我轉會加盟，成就了我的第１次上報。第１次好誇張，是A1頭條，2006年6月25日，標題是「補習天后跳槽費800萬，勁敵英皇教育挖角，當代巨額索償」。聽落好次好大件事咁，其實1個月內已擺平，我繼續安心教書。喺《英皇教育》一教教左10年，依10年內，我都上報最少上左2次。另一次是很無聊的，2007年7月21日，標題是「巴士火燒後欄，乘客逃生」，原來那架著火的巴士尾有我的廣告，當日學生上堂時見到我第1句就話「Mia你後欄著火呀！」我睬！我後欄都不知幾正常。
我同車依樣野都係幾有緣的，2013年7月25日，我架車冒煙，我就報警，結果記者黎到，影影影，消防員同救護員抄底我身份証資料時知我生日，喺條街度同我講Happy birthday，結果7份報紙的標題是「慶生日座駕險自焚，補習天后大吉利是」、「補習天后百萬座駕冒煙」、「馬莎拉蒂水滾，補習天后跳車」。。。只不過壞車姐，唔洗作到「跳車」下嘛。。。
到今次再上報，睇黎我已經慣左，冇乜特別感覺。依啲就可能叫做「可貴經驗」，如果之前冇上過報，今次應該驚到癲左。好多學生喺Facebook同Instagram留言力撐，叫我要加油，祝福我大步檻過之類。首先，我當然好感動啦，有啲舊生成十幾年冇見，雖然唔係成日同佢地傾計，佢地都一直有留意同關注我，喺我遇上困難時開聲支持，依份「這麼遠那麼近」的情義，刺激我嘅淚線。
我一直叫同學們唔洗擔心，原因係Mia係一個思想好成熟嘅人。我行每一步，都一定諗過度過。就好似上堂我講書咁，你地唔好以為我口才好，成日諗到乜就可以好順暢咁講，其實上一堂1hr 15mins的堂，我備課要3-5小時的，我一定會plan好點講先可以令你地易明，同埋令你地慢慢愛上英文。若然對學習冇愛，你好難學好的。所以今次我轉過現代，我有極強嘅心理準備，包括有可能涉及法律程序。上一個月的筆記中提過，我只想提供一個令我開心嘅地方俾我嘅學生繼續接受我嘅教育，我知道我嘅轉會選擇可能會被人告，但我都好有決心要冒這個險！當中有好多難言之隱，有好多苦衷，我未能一五一十同你地分享，待官司完結後，有機會再同大家分享一下吧。
打官司，有人會怕，有人會勇敢面對，我是後者。如果我是在冇理據情況下轉會，我當然會怕，但我的motto是「只要問心無愧，不傷害別人，就要據理力爭」。我會以唔影響我嘅教學為大原則下，盡力打好依場仗。其實結果得2個，一係打贏官司，一係打輸。打贏的話我一定會同你地慶祝的，慶祝公義長存，真理必勝！ 但我做事永遠都會prepare for the worst的，萬一事情結果未能如願，真的輸了而又要賠上一個我唔能夠承擔的金額，我就申請破產！
對於「破產」一詞，對好多成年人嚟講喺好可怕的，它代表「乜都冇晒」，接住4年要過好慘的生活。但對我而言，有另一個演繹。所謂「乜都冇晒」，講來講去都係錢姐。「錢」有幾重要？佢重唔重要得過愛情？友情？親情？個人修養？一次的「破產」，會否奪去我所有知識？有好多事，唔一定需要用「好多錢」去成就的。例如，沒有靚車渣，咪搭巴士地鐵lor，我真心覺得搭巴士地鐵唔慘的。例如，沒有靚屋住，但我有家人及愛人的屋，唔洗瞓天橋底卦。例如，冇靚衫著，講真，就算我依家屋企啲衫多到爆晒冇位放，我味又鍾意著嚟著去果幾件，要做到最底要求「禦寒」，又有幾難？例如，唔可以食好嘢，咩叫好嘢先？上至6星級酒店分子料理我好多都試過了，但我仍然覺得燒賣香腸係好食的，點會餓死？！例如，唔可以去旅行了，我今年1星期教足7日，同樣都冇旅行去，又如何？加上，好多地方我都去過了，已到了無憾嘅境界。
我明白好多人怕「破產」，係因為覺得好冇面。我覺得要睇咩原因，如果係因為自己衰爛賭借錢又還唔到果啲，破產即係話俾人知自己曾經做錯事，可能真係會覺得冇面。但如果我破產，個原因係我想提供一個更好嘅地方俾我啲學生上堂而被阻止被失敗，我唔覺得「冇面子」。
你地放心，即使我真的「破產了」，我仍會教書的，就算是「義教」我都會繼續教的。做人要對得住良心，學生是無錯的，我應該繼續用心教，令更多學生受惠。今年生日，我喺Facebook同Instagram打左一段野去感激我愛人。坦白講，冇另一半想自己的女人咁煩惱，所以決定轉會一刻，佢曾經多次求婚，叫我嫁俾佢之後移民澳洲，一生無煩惱，快快樂樂做少奶奶。但當我同佢講「我真係好想繼續教書，你俾我教落去，我真係好鍾意教書，我唔想做一個對社會冇貢獻嘅廢柴」。佢最後都係選擇同我一齊承受可能出現的官非，一切輿論，一切心理壓力，所以，我真係要真心多謝佢。
同學，如果喺你一生路上，有幸遇到一個肯「接受你的任性，全力做你後盾」的人，你一定要好好珍惜，因擁有一個全心愛你的人，並不是奉旨的。我感恩我現在擁有的，除了家人、友人及情人，仲有一直咁支持我的你地。愛你。
2016年8月某日