《其實我有啲咩》

上星期, 6合彩開彩, 中頭獎嘅幸運兒派彩有9千幾萬, 以下係我同朋友A嘅對話:

我:「嘩! 9千幾萬, 係咪傻咗, 中咗嗰個人真係開心死。」
朋友A: 「搞錯呀! 個天咁唔公平架, 我今期都有買啦, 又唔俾我中, Shxt!」
我:「喂, 呀生, 依度你最冇資格講依番話, 你前年先中過頭獎! 仲話個天唔公平?!」
朋友A:「妖, 講呢啲。我上次中先得個1000萬, 人地中個啲係9千萬呀, 差9倍呀靚女!」

唉, 人就係咁架啦, 永遠都只係focus喺自己冇嘅嘢, 又唔欣賞吓自己已經有乜嘢。好多人成世人買咗幾十年6合彩, 最低派彩 $40都未中過。我依個朋友中過1000萬, 就成日呻自己中得唔夠多, 而唔諗下自己當日中嘅時候講過:「嘩, 好勁呀我, 真係好彩, 個天咁都俾我中, yeah!」

我曾經睇過一本心理學嘅書, 都有講過, 人好多時都只會刻意去記一啲唔開心嘅嘢, 多過開心嘅嘢; 而佢地亦都會選擇去認同負面, 否定正面。所以教我玄學風水命理嘅師父都同我講, 幫客人批命時, 大部份都會覺得師父講負面嘅嘢係準啲, 而正面嘅嘢冇咁準。我同意, 以下係我同一個搵我幫手批命嘅人嘅對話:

我:「B小姐, 你桃花好旺, 成日都有人追喎。」
B小姐:「唔係好準喎, 我又唔覺我好多人追喎。」
我:「咁依一刻有冇人追緊你?」
B小姐:「3個啫, 唔算多吖。」
我:「………… (3個都唔叫多, 唔通3打先叫多咩, 死港女) [我忍] 而追你嘅人, 大部份都係有錢人嚟喎。」
B小姐:「吓, 唔算囉, 渣架爛鬼benz嚟接我, 個架cheap嘢最多值50萬, 又唔係法拉利。」
我:「………… (法拉利, 你估你係千語BB咩, 收埋啲 skin啦) [我忍] 不過, 你對另一半多挑剔, 結到婚嘅機會好微。」
B小姐:「又幾準喎, 我真係成日覺得追我嗰啲蛋散唔多掂! 咁點算呀? 唔係嘛! 我冇人要呀? 我咁嘅質素都嫁唔出, 唔好卦, 師父咁點算呀, 你要救我呀, 我唔想嫁唔出, 我要嫁有錢人呀! 我唔想咩都冇呀, 你一定要救我呀!」
我:「咁又唔係世界末日嘅, 你身體非常健康, 長壽冇乜病痛; 有貴人扶持, 事業運非常好, 一生衣食無憂, 父母身體都好, 係屬於上等命, 唔差架。」
B小姐:「係啫, 但係我冇老公喎, 好大鑊啫, 依家食龍肉都冇味啦, 唉 x 10000000000000, 咁點算呀?! 咁點算呀?! 咁點算呀?! 咁點算呀?! 咁點算呀?! 咁點算呀?! 咁點算呀?! 咁點算呀?! 咁點算呀?! 咁點算呀?!」

有冇搞錯, 佢命水都真係唔差, 雖然結到婚嘅機會唔大, 但都叫多桃花, 有人欣賞之餘又身體、事業，財運各方面都唔錯吖, 而佢就只係focus喺自己最弱個part搞到自己勁唔開心, 有乜為呢? 點解唔開開心心睇吓自己擁有啲咩? 可以比人地擁有的多, 應好好珍惜。

你又係咪咁嘅人? 有冇試過成日諗:「點解我老豆唔係大有錢佬?」當你埋怨自己父母唔係有錢人嘅時候, 有冇諗過有啲同學連去補習嘅錢都冇, 你daddy mommy願意喺佢地有嘅嘢入面分一啲俾你去上你鍾意嘅tutor嘅堂, 你應該要好好珍惜啦。」

「點解我個樣唔夠靚嘅?」你有冇諗過有啲人一出世身體就有缺陷, 兔唇 / 遺傳性甩頭髮 (地中海) / 面上有大胎記等等, 佢地同樣都係冇得揀, 而你有健全嘅眼耳口鼻, 應該珍惜及高興。況且, 要做一個生活得開心同成功嘅人, 樣靚唔係必然嘅條件。就好似 David 咁, 佢成日都咁開心, 因為佢唔成日focus喺佢個樣唔夠型, 唔夠Mia咁吸引, 唔夠Mia咁醒, 唔夠Mia咁有內涵, 唔夠Mia咁受歡迎等等, 而選擇去記住佢有嘅野: 有Mia成日喺佢身邊, 祝福佢每日可以順利開心健全地活下去。David, 就是最後的大贏家! 大家都學下吧。
2014年1月