《再見，我從前的靚靚聲帶》

先送首兒歌俾大家：（My Bonnie lies over the ocean）
My 聲帶 lies over the ocean, my聲帶lies over the sea.
My聲帶lies over the ocean, O bring back my聲帶to me.
Bring back, bring back, O bring back my聲帶to me, to me.
Bring back, bring back, O bring back my聲帶to me.

今次真係慘豬豬，我把靚聲消失了。。。
事原11月尾，一場感冒突襲，我又懶醒，覺得流兩滴鼻水 + 多兩聲咳，冇事嘅，照去上live，唔好轉做video啦，怕學生見唔到我上live而失望吖嘛，頂硬上啦。結果，咳住教左4個鐘。落堂後，由沙聲變冇聲，只能噴氣咁講嘢。其實上堂時我都好鬼辛苦，長期有舊唔知係「痰」定「鼻涕」嘅物體，吊住喺鼻同喉嚨中間，唔上唔落。不停講嘢要抖氣換氣快先得，但就因為果舊物體喺喉嚨「click」住，搞到每下呼吸都要好用力。講慢啲又唔得喎，我怕教唔晒我想教嘅內容。本身諗住最多辛苦4個鐘姐，落堂後有得唞，唞下咪冇事。結果，真係「Mia，你太年輕了。」諗得太簡單。。。

原來時間悄悄流走，亦同時間帶走埋我嘅健康。回想起，十幾年前，Mia仲係2字頭時，每日教10個鐘都未驚過，最多咪攰啲，但點攰都唔會咁易病。可能因為始終年輕力壯，有咩病菌都被我強勁嘅意志力打底呀！但就係因為不斷嘅唔錫身，上得太多live日日講，晚晚做筆記答學生問題+備課，唔夠訓，搞到家下好易「被KO」。到左今日，我好同意有人話「有咩襯後生去做啦」，想去北極旅行，襯仲捱到凍，去啦！想行絲綢之路，襯仲行到唔易攰，去啦！想晚晚BBQ，襯後生點食都唔熱氣，去啦！各位同學，真的，「有些事，你現在不做，一世都不會做，年紀大時你亦冇機會做。」

我失聲果幾日，對住我愛人喊：「嗚嗚嗚。。。我最鍾意講嘢，點解唔俾番把聲我呀，我仲有好多8卦嘢想同你講㗎。。。」佢話：「好少事姐，咁咪8少陣，又唔洗死嘅。」
「嗚嗚嗚。。。我唱歌咁好聽，依家搞成咁，我仲點表演我嘅歌喉俾你聽呀。。。」佢話：「你唱得點好聽，都唔夠我播首mp3聽歌星唱咁好聽㗎啦。」
「嗚嗚嗚。。。我咁鍾意講書，如果真係成世失聲，咁我嚟緊下半世做咩好呀。。。」佢話：「咁咪唔好教，下半世做我煮飯婆。。。。。。。。。。。。。。。。。。。。。。。。。。。。。」
我問佢：「你咁樣係咪即係求婚呀？你之前求過3次都失敗，你係咪試緊第4次呀？」
佢話：「咁你肯唔肯姐？」
我用唇語答：「Sorry，我。講。唔。到。嘢。呀。。。答。你。唔。到。呀。。。」
佢跟手又話：「無論你第日會唔會變聾啞人士，甚至變埋弱智，我都會照顧你一生一世。」
果下其實我心郁郁想講「OK！」，因確係有啲感動，但諗落，結咗婚要做師奶，「補習天后」之名從始慢慢離我而去，犧牲太大，都係唔得，唯有答佢：「屎急，瀨啦瀨啦，咇緊出嚟啦，下次先傾。」成功閃人～

其實每次拒絕佢，我都覺得佢好慘，拍著個事業心太重又唔正常嘅女朋友。但如果我應承佢，到你地好慘，因佢想我同佢結婚後移民到澳洲，冇得再教書，你地就從此失去一個「非常perfect」的好miss。

但有一樣嘢係真的，如果我從此失聲，真係想再教都冇得教。咁點呢？好矛盾。我又想繼續教，但教得多把聲+健康又變差。你地諗唔諗到有兩全其美嘅方法呀？我愛人暫時諗到一個方法：減產！即係書可以照教多幾年，但唔好一星期怒上live，應開多d video班，養聲之餘又唔影響教學質素，一箭雙鵰。

佢諗到好似好perfect咁，可能始終因為佢唔係教果個，佢冇份接觸學生。我比佢清楚好多。上live又有上live嘅樂趣，有時我講完某啲 gag，見你地笑得開心，抄嘢學嘢時又好留心落力，落堂果下都唔捨得走，仲會send messages嚟多謝我，我真係好開心的。我應該好好襯我仲可以教，有能力教，多啲去唔同centre見你地，教你地。

新年流流，我唔應該講到自己就快瓜咁，應該講多啲 happy野嘅。2017年我最大願望，就係健健康康，可以繼續盡力教好每一堂，希望你地啲英文都不斷進步，咁我就會覺得無論每堂聲嘶力竭講得幾辛苦，所有嘢都係有價值的。
2017年1月某日