《我愛苦, 我愛禍》

早前我堂上同你地講過, 上年醫生發現我有cancer, 我記得有同學喺堂上即時擺出一副好擔心嘅樣。我唔肯定佢地係擔心我會冇命, 定係擔心如果我死咗, 可能會變鬼返嚟催佢地交文… 除咗我嘅學生擔心之外, 我愛人同屋企人當然都好擔心啦。我記得當醫生同我講要入醫院做手術, 我啲眼水不其然開始標出嚟。由於我轉數好快, 佢未講到安排邊一日做手術、入邊一間醫院, 我已經開始諗「究竟火葬定海葬好呢? 搵邊個禮儀師幫我化個死人妝會靚啲呢? 我應該點樣好好安排我啲財產呢? 死之前仲應唔應該咁辛苦減肥呢? 要同英皇傾下如果我死咗, 班學生點安排好呢? 下刪3千字。」

到一年之後嘅今日, 我平安冇事坐係度, 諗番又得啖笑。當日諗咁多, 全部多鬼餘, 嘥晒我啲心神去安排, 浪費晒我愛人+屋企人+朋友+學生嘅憂心。依件事令我諗起一個故事: 偉大嘅發明家愛廸生, 有一晚發現佢嘅實驗室大火! 正常一個視工作如命嘅人, 應該第一時間去整熄啲火, 免得一場火燒晒佢大半生嘅心血。但佢好搞笑, 佢冇即時去拎水嚟, 反而叫醒晒佢啲仔起身, 叫佢啲仔一齊嚟欣賞下依一場百年難得一遇嘅大火, 何其壯觀! 依場火熄咗之後, 愛廸生笑得好開心, 對住個天講:「多謝上帝, 多謝你安排一場火, 幫我毀滅一直以來做錯晒嘅野, 等我唔洗再嘥時間行冤枉路, 聽日, 我決定整一個更大, 設備更新更齊全嘅實驗室!」(當然係用英文講啦) 我好欣賞依一位咁有悟性嘅偉人, 當有災難嚟到嘅時候, 佢冇怨天尤人, 冇悲觀消極, 反而換一個心態, 先感恩上帝用一場火比啟示佢, 再用樂觀積極嘅心態重建更光明嘅路。

上年當醫生同我講我嘅cancer係嚟自我唔儉點嘅生活, 我冇選擇怪個天: 「點解係我有cancer而唔係人地; 點解喺我事業最高峰嘅時候話我知我有病; 點解喺我搵到一生中最愛嘅人嘅時要我離開。」我反而選擇重整我嘅生活模式: 由每晚5am先瞓改早啲, 1am瞓; 由一日3餐唔定時改到適時進食; 由只食煎炸辛辣冇益嘅嘢改食清淡一啲。感激上天比咗一個啟示我:「做人要平衡生活, 唔可以只得工作and忘我瘋癲嘅生活」。依家我改變咗, 做人開心咗, 亦健康咗, 依啲可能就叫「因禍得福」。

今年我返醫生度覆診, 我好開心咁問醫生:「點呀? 我依一年健康咗, 有聽你講唔好做太劇烈嘅運動因為驚傷口爆開, 係肥咗姐, 但身體其他部分都應該好咗好多, right?」醫生deadair咗5秒, 然後話:「你嘅病情係比上年好咗好多, 但有復發嘅跡象, 我要安排你再入手術室。」當我轉述依番話比親友知時, 佢地好多都話:「有冇搞錯呀, 你已經好聽話咁改咗好多啦, 仲返發? 係咪個醫生有問題呀, 告佢啦!」我聽完之後, 一笑置之:
1) 係咪罵到個醫生狗血淋頭我會開心啲, 繼而冇病好番? 罵人嘅人仲要動氣, 仲唔開心過被罵嘅一個, 我冇咁蠢!
2) 病情返發有好多原因嘅, 可能細菌強咗呢, 仲自強得快過我變強呢?
3) 生老病死, 人生必經, 其實又有咩大不了, 人人都有機會遇到。

今次醫生話我再要做手術, 我嘅心理質素比上年強, 極大嘅原因可能因為上年已經試過一次, 最後咪又係冇事, 依家擔心嚟又係多餘。人生路上, 必有高低, 唔會有人一世開心, 同樣唔會有人一世悲哀。如果冇壞嘅事發生, 冇對比, 點會知道咩叫好。如果我冇病, 我唔會識珍惜身體健康時無憂無慮嘅快樂。冇逆境, 我享受唔到順境時嘅得意。冇捱過苦, 我唔會知咩叫甜嘅生活。

小學4年班時有一次大考英文唔合格, 我覺得係好大件事, 好怕比老豆罵, 驚咗成晚, 喊咗幾個鐘。中五會考, 好緊張, 驚到失眠。中七高考, 更緊張! 見工, 又再緊張! 依家咪又好成功咁坐喺班房用極好嘅英文教書。以前一切好驚好怕嘅難關, 一關又一關咁過, 無論幾難過, 都總會過, 唔會維持一世的。

當你都能視世上一切為無常, 你唔會再為一啲小事而唔開心。同男朋友仔/女朋友仔分手? 舊嘅唔去, 新嘅唔嚟, 上天安排你倆緣份到此, 一定係因為佢已有另一個更好的安排比你, 同你一齊去經歷一啲新嘅考驗, 請耐心等待吧。同朋友仔嗌交? 唔遇過壞朋友, 點會分到邊一啲係真心好朋友? 又或者當你同所有朋友絕晒交時, 孤單寂寞嘅時候又比你一個機會靜一靜, 諗一諗自己有冇做錯, 搵出問題根源, 盡快修正, 重整你嘅友誼圈, 當之後你再遇到真心朋友時, 你會更珍惜。交過一次文比我, 勁低分? 唔作過第1次, 你點會有機會感受到第2次交文比我時高分咗嘅喜悅呢?

知否世事常變? 佢要變, 就係要比你體驗一吓唔同嘅生活。只有睇得越多, 你嘅知識先更豐富, 你嘅人生先能夠昇華。遇到挫折、苦澀、災禍, 又有咩好怕喎, 至怕你未遇過就真!
2014年6月