《斷背情》
喺堂上, 我地一直質疑David嘅性取向。聽聞有學生喺佢Facebook 問佢係咪鍾意男仔, 問咗超過20次, 當事人都冇正面回應, 何解? 你地知我一向心地好, 為咗滿足苦纏嘅同學仔嘅求知慾, 姐姐又豈能坐視不理呢, 就由姐姐出馬, 問個究竟吧! 殊不知, David仔居然駛出一招先發制人, 問番我轉頭:「Mia, 你肯講先, 我就公開我嘅秘密!」 …我……我……
我對斷背情嘅睇法, 同埋我嘅取向, 有買我本 <補習天后手記> 嘅同學就最清楚。小學4年班嘅時候, 有個姓陳嘅男同學鍾意咗我個best friend, 我best friend問我:「死啦Mia, 我又係姓陳, 如果第日我同佢拍拖, 人地咪會話我係同性戀?! 之後再生埋bb, 大家都姓陳, 咁會唔會俾人話我地亂倫?」雖然n年前性教育並唔普遍, 但稍為有智慧嘅人都知同「姓」拍拖唔係叫「同性戀」啦, 死白痴! 豬頭炳!
我嘅初戀喺大學1年班, 當時嘅lover係男仔。第2次拍拖喺大學3年班, 對象都係男仔。第3次再拍拖喺26歲, 佢都係男仔。打後到依家再拍咗幾次拖, 佢地通通都係男仔。而係咁多年嚟, 就試過有2個女仔追過我。講下第1次吖, 當時我喺26歲, 有個女仔同我幾啱key, 成日搵我食飯傾計, 好快我就當咗佢係其中一個best friend。初初我真係唔知佢原來係鍾意女仔, 因為佢只不過係短頭髮, 而短頭髮嘅女仔又唔等於女同性戀者。同佢相處嘅時候, 其實同其他異性戀嘅朋友差唔多, 咪又係成日傾電話, 講吓心事, 去唱k, 開心時攬頭攬頸掂吓手仔, 唔開心事攬住喊餐飽咁。直至有一晚, 雷雨交加…(係咪以為我講咸濕野呢? 我係唔會的, 我係一個良好小女孩, 你妄想了) 直至有一晚, 我搵佢陪我去酒吧飲嘢傾計, 我同佢講:「最近有個男同事追我, 我唔知好唔好同佢拍拖, 因為佢個人好似好花fit咁, 我怕我依啲無知少女會落陷阱呀, 但我都有啲鍾意佢, 點算好呢?」我講完之後, 見佢眼發淚光, 好似好激動咁, 唔知佢做咩, 突然企咗起身, 衝左入toilet ! 果吓我都唔知應唔應該衝入去搵佢, 因為我唔知佢咩事, 如果只不過係突然肚痾衝入toilet, 咁我衝入去做咩姐? 陪痾呀? 未臭過咩。
過咗5分鐘左右, 佢send咗個SMS俾我 (果時未有WhatsApp), 佢叫我等佢一陣喎, 好啦, 等啦等啦。過咗15分鐘左右, 佢突然喺正門出現, 拎住一支玫瑰, 行到我面前話:「Mia, 可唔可以揀我?」What!!! What the xxx!!! 喺果一刻我先知原來佢一直當我同佢嘅友情係愛情! 事發太突然, 我冇乜經大腦就講左句:「咩料呀? 你係女仔嚟!」
唉, 事後諗番, 我真係唔應該咁回應佢。其實「愛」依家嘢, 唔應該局限於gender (性別), 任何人都可以對任何人/事物有情, 就正如好多女仔都超鍾意Hello Kitty 同嘉欣BB, 唔通咁又叫唔正常?! 夠有好多男仔鍾意金秀賢啦, so what? 不過最後我都係揀咗同男同事拍拖, 因為我本身都係對果個男仔有love feel多啲嘅。
近依幾年, 又有另一個女同性戀者追求Mia了, 嗰次係一個大考驗, 因為佢, 超! 靚! 仔/女! 你望住佢, 就好似望住件藝術品一樣! 雖然媽媽成日教, 千祈唔好以貌取人, 但冇辦法, 佢外表真係好吸引, 係屬於「唔望就對唔住自己」果隻。初初佢第一次見到補習天后, 好有興趣認識我依個人, 而我覺得佢靚, 所以都想認識下佢, 見多佢幾面。起初我地係好好嘅朋友, 直到有一日我地講下大家嘅揀偶條件…佢一俾我睇個list, 好明顯啦, 你地自己睇:
1) 樣貌討好 2)高挑健壯 3)有時代觸覺 4)聰明伶利 5)獨立有主見 6)唔煩唔痴身 7)風趣幽默 8)唔講粗口
拿, 坦白講, 除左第8點偶爾不能自我控制而犯, 其他全部好明顯係講我, 中晒! 聰明嘅我, 即問佢:「你不如索性講明係我啦!」佢甜笑一野, 跟住講:「咁如果我追你, 你會唔會考慮?」…依條問題, 同你地平時問我嘅英文問題相比, 難答一億倍……今次我唔可以再重蹈覆轍講啲 hurt人嘅說話, 我答佢:「我要啲時間詳細考慮, 因為實在有太多技術上同心理上嘅問題要解決了…」
不得不承認, 大部份嘅lesbians 比起男仔細心, 更懂得令另一半開心, 極可能係因為大家都係女仔, 好明白大家心裡面要啲咩。就例如喺冬天嘅時候, 男朋友會叫你:「著多件衫, 唔好凍親。」而較細心的, 會講:「今日凍咗, 唔好凍病, 我今晚放工拎啲暖包俾你。」而佢見你嘅時候係會買多一條頸巾, 一碗熱粥, 寫多一張會令你甜爆嘅card添。其實何為「愛」, 到姐姐依個年紀, 仲未完全講得出個definition, 但我好肯定, 每個人都需要被愛, 才會活得快樂。
所以, David, 無論你喜歡誰, 無需怕羞, 公諸於世吧!
2015年9月