《減肥依家野, 你識條蟲咩?!》

一直有補開我嘅同學仔, 對於我嘅減肥事跡應該知唔少, 成日上堂或堂與堂之間我都講唔少我嘅心得過你知, 難得今日有興致想分享下, 我就嚟個大公開, 大踢爆!

話說我一出世開始至到小學3年班, 都係好瘦好瘦嘅。果時老豆成日迫我食嘢, 我又偏偏覺得食物依家嘢一啲都唔吸引。我寧願通山跑成個野人咁, 周圍去球場踢波成個麻甩佬咁, 坐係公園睇星星成個流浪漢咁, 我都唔想坐定定食飯。老豆同呀媽用盡千方百計企圖令我肯開金口食嘢, 用藤條怒打, 用$5利誘我食飯, 全部都失敗! 因為1) 我被人打通常都好忍得喊, 一粒眼淚都冇, 佢地以為我唔怕痛 (其實堅痛死忍) 2) 我係唔會為個區區$5而出賣自己嘅 ($5000就有得諗)。佢地冇晒計, 結果出絕招: 問街坊!

住隔離屋有個肥太太, 生咗5個仔女, 個個都肥肥大大隻, 隻隻都似胖虎 (當年我個年代叫“技安”)。每日我放學返屋企壓力都好大, 好怕見到佢地, 是但一隻壓埋嚟, 即斷氣暴斃! 我呀媽見佢地全家都咁健壯, 衰多口走去問佢有咩方法可以整肥佢啲仔女, 惡夢開始了…有一日佢拎咗一樽液體返嚟, 我聞一聞, 好頭暈, 索一索, 心情低落, 睇埋樽嘢入面個啲一隻隻有尾嘅物體, 內心爆左一句: 「整你個…」係疑似老鼠酒! 我呀媽每日都餵我同我呀哥飲, 結果……

我4年班開始, 每餐要食6碗飯先夠皮, 肥, 係必然的事! 肥呀肥, 肥呀肥, 一直肥到中3。每年新年最頭痛。 呀媽話新年要買新衫, 帶我去啲 mall度買衫, 其實果時我對fashion冇咩研究, 求其著得落咪得囉, 洗乜煩。「著得落」依個咁底嘅要求對於當時肥爆嘅我, 原來都好難滿足到, 所有童裝店都冇我size。我記得我呀爸呀媽就同我講:「呀女, 睇下你個肚腩, 減肥啦, 唔係第日冇衫著㗎啦。」喂, 我搞到今時今日咁嘅身型都係拜你地啲疑似老鼠酒所賜, 依家嚟埋怨我肥, 心裡面再一次「整你個…」

上到中4, 放緊暑假, 有日無無聊聊照下鏡, 擠下暗瘡時發覺: Mia呀Mia, 其實你個樣都唔叫差嘅, 雖然眼又唔夠大, 鼻又唔叫高唔叫直, 皮膚又唔係白雪雪, 但起碼骨格精奇夠高大, 下巴兜兜晚景冇憂, 笑起上嚟仲冇人想打你添, 如果你瘦番啲, 應該可免強叫做一個索女! 襯放緊暑假咁得閒, 每日跑步啦! 結果每日黃昏都跑街1個鐘, 1個月就輕咗18磅~ 瘦, 是這樣練成的~ 之後keep住一星期最少跑1次, 再輕啲再輕啲, 得咗~

中4之後至到2013年, 反反覆覆肥吓瘦吓都係7磅咁上下上落, 可能由於飲過疑似老鼠酒, 體內存在一度氣, 令我食好少都易肥, 但我又肯跑步, 又令我可以瘦番, 所以冇咩大煩惱, 但上年嚟咗一個噩耗…

醫生話: 「黃小姐, 我拎咗你一啲細胞去化驗, 證實咗你有癌前病變, 不過依種病變分5級, 要同你做個手術先知道係第幾級, 你要快啲入院做個手術先!」 聽完醫生咁講, 我真係即時覺得, 上一年係我教學生涯最後一年, 係堂上面真係好想同學生講定遺言。我好記得係上年4月尾, 結果我冇係Facebook同你地講我做手術, 因為果時啲 F6同學考緊DSE, 我怕影響到佢地考試心情。手術完咗, 醫生話我未死得, 不過以後唔准好似以前咁夜瞓又食冇定時, 同埋手術完咗之後 6個月內都唔好做運動, 否則傷口會爆開。好啦, 聽下醫生講啦, 結果冇跑步半年啫, 我重咗20磅…

好恐怖, 依家我成日拎番我細個好肥個啲相出嚟睇, 要警惕自己唔可以再咁落去, 否則會變番以前果個樣。今次我嘅減肥行動好艱辛, 除咗因為手術完咗之後身體虛咗, 冇以前咁好中氣去跑咁耐之外, 我愛人同我一樣都係勁鍾意食! 累鬥累, 進度相當慢。不過唔緊要, 學我細個果陣學英文時話齋:「無野難到我, 我要威, 我唔要帶頭盔, 我Mia Wong一定掂!」 希望依吓堅持可以令我再次減肥成功, 各位, 拭目以待!
2014年5月