《青海籌款之旅》

小女子真係好鍾意去旅行的，最高紀錄係2012果年去左11個旅行，短有2日1夜，長至15日都有，但咁多年嚟，我只肯去一啲生活水平較高或較安全嘅地方，例如日本、韓國、英國、美國、意大利或西班牙等等。我覺得，去旅行都係想開心姐，無理由去旅行仲要辛苦過留喺HK 姐，right? 2個月前，英皇高層問我：「Mia，你捱唔捱得架？」捱咩先？「瞓街！」吓！唔係卦！

原來英皇教育同香港失明人協進會搞咗個「英皇教育傷健青海籌款之旅」，英皇嘅首席導師作為同行伙伴，帶領視障人士到青海，一齊步行籌款。其實如果同我講要去絲綢之路或萬里長城之類嘅東西旅行，我一定拒絕，但今次係籌款活動，我覺得好有意義，加上咁大個女都未真正接觸過視障人士，今次應該係好好嘅機會俾我了解下佢地嘅生活習慣，無論我幾咁怕搭內地內陸機，幾咁怕內地啲衛生環境，幾咁唔信內地嘅食物都好，今次依行一定要say yes！

出發之前，我地同啲盲人朋友開咗個茶會，有專業人士教我地點同盲人相處。你地識我咁耐，都知我係問題中女，我真係有好多嘢想問定先：
問題1）佢地成日拎果支棍係地下篤吓篤吓，點解有啲棍係白色，有啲係紅白間嘅？
答案）果支盲公竹唔同色代表唔同嘢，全白色叫white cane，代表有視障； 紅白間代表視障加聽障。

問題2）通常冇視力嘅人，聽覺、嗅覺同觸覺都特別勁，係咪真架？
答案）係呀，你放幾多個屁佢實知架！試過有個視障人士問個義工係咪腸胃唔舒服，因為佢聽到朝早放咗3次屁呀，但個義工死都唔肯認。其實呃唔到啲視障人士架，佢地憑聲音同嗅覺就知篤屁係邊個屎忽出的。

問題3）如果我到時唔小心講咗「喂，睇吓，個景幾靚，快啲睇啦，睇吓啦！」會唔會hurt到佢地架？
答案）你地當佢地係平常人得㗎啦，佢地唔介意你話佢地盲，話佢地睇唔到嘢，只要你唔好用恥笑嘅態度奚落佢地就得。到時要考考你啲形容詞啦，你一咪話好靚勁靚超靚，佢地感受唔到有幾靚架，你要準備多啲形容詞，例如一望無際、海天一色等等。（大鑊，我可唔可以用英文。。。）

問題4）如果佢要去toilet，我帶到佢去屎坑 ，洗唔洗幫佢除埋褲，幫佢數「3、2、1，痾得，得咗！」？
答案）千祈唔好望住佢地痾呀，痾唔出架！你應該帶佢去到toilet，話佢知係坐廁定踎廁，面向緊定係背向緊，廁紙同沖廁位係邊 （用東南西北，或者講幾點鐘位置），話俾佢知你會唔會幫佢閂門。唔好咁衰呃佢話痾得，其實帶咗佢去蜜蜂「鬥」呀！

好彩開咗個茶會，否則我都唔知咁多嘢要準備。原來青海朝早曬到癲，夜晚又凍到傻，因為果度冇乜雲，所以日夜溫差好大，即係我又要帶防曬夏天衫，又要帶防冷冬天衫，個喼好鬼重呀。由於我天生已經皮膚黑，用咗三十幾年美白產品依家先叫唔太似非洲族裔，依次去一去依9日，我極度恐懼，我要準備一套由頭笠到落腳指尾嘅防曬裝備！我帶晒啲嘢上身，成個賊咁，以為萬無一失，點知英皇打嚟話：「Miss Wong，到時我地會拍片，要清楚見到你個樣。」。。。搞錯。。。要放低幾件。。。

打依份搞時，係出發前一天，我同Wilson Liu互WhatsApp睇下大家有冇帶漏嘢。聽聞內地人曾用老鼠肉當牛肉咁煮俾人食，所以我決定如果見唔到個形，我係唔會食的。例如，栗米班塊，唔食，清蒸成條魚先食；炒牛肉，唔食，白切成隻雞先食；炆羊肉，唔食，明火燒成隻羊先食。Wilson聽完，決定買定大量杯麵、媽媽腸，牛肉乾！我都帶4個杯麵，但我估唔到佢帶10個！我都帶3條媽媽腸，估唔到佢帶1打！極度懷疑佢平時係HK嘅食量，相信與暴龍無異。。。

其實我仲有啲怕悶添，因為內地冇得用Facebook同Instagram，夜晚瞓唔著唔知點算。我叫咗David ready，我send相俾佢，佢幫我post係Facebook俾你地睇。我想帶成套武媚娘去睇添呀，但又好似有啲誇張，都係帶書算啦～

當中有2晚露營，冇得沖涼事少，冇toilet事大呀。咁大個女都未試過係街痾，呀媽教定我一定要講「唔該借借」。但如果我痾緊，Wilson又突然間喺不遠處又痾緊，真係尷尬死，都唔知傾唔傾計好。。。係喎，今次仲要係我第1次去旅行時1個人1間房，希望冇靈異嘢發生啦，有嘅話返嚟上堂一定同你地開心share～ 好啦，我繼續執行李啦，暑期班見～
2015年7月