《驚咩啫你?》

上星期同班friends食飯, 互相問下近況。通常佢地會問:「Mia, 點呀, 最近有冇拍拖? 幾時先肯嫁人呀? 你同助手David係咪有路呀? 依家住邊呀? 肥左幾多磅呀? 上堂有咩搞笑騎呢嘢呀? 有冇變態學生跟蹤你呀?...」

以上嘅問題重複又重複, 我答過9千幾次, 但有幾條問題我覺得好interesting, 值得同你地share。

佢問:「其實上你堂嘅學生係咪個個都好迷戀你呢?」
我答:「哈~ 迷戀就稱唔上, 但鍾意聽我講嘢就大部份都係!」

教咗咁多年書, 見過咁多種唔同嘅學生, 我最有資格同佢地分享。我啲學生補完1期, 如果下1期仲見到佢喺班房上堂, 唔洗講, 佢一定唔憎你先, 如果係憎你, 唔鍾意聽你教英文, 佢下個月仲會俾學費再嚟上堂咩?! 外面咁多英文導師, 質素好壞咩都有, 如果個導師真係教得唔好, 啲學生自然會轉導師, 我又冇拎起支槍指住佢地個頭迫佢地交學費, right?

佢再問:「咁竟然佢地咁鍾意你, 佢地上堂時係咪個個都眼金金望實你, 個樣好鬼冧?」
我答:「10年前啲學生個樣就真係好鬼冧, 依一代唔會啦, 最多只有1%學生仲會表達佢地內心嘅真正感受。」

可能10年前依個社會未太興Internet, 加上社會風氣良好一啲, 好多中學生嘅思想係純潔啲。上堂嘅目的就係從老師身上得到最多嘅知識, 所以大部份都好留心上堂。老師問問題, 識答嘅同學會好願意分享答案, 就算答錯, 佢地都唔介意, 因為糾正嘅過程先係最重要。俾老師糾正過一次, 佢以後都會記住正確嘅答案, 再犯錯嘅機會細好多。

但依家冇依支歌仔唱啦, 我每次問問題, 都會留意大家嘅反應, 依家95%嘅同學好似俾人噴左定型劑, 除咗心臟仍然跳緊, 呼吸亦健在, 身體其他器官似乎係停止咗運作, 面冇表情, 全冇反應。另有4%同學, 做口型咁答, 聲音分貝應該係零, 祈求Mia識讀唇語, 可以成功估到佢答乜。只有1%同學, 勇敢咁試下答。

為咗拆解依個咁新奇嘅現象, 我閒時會好認真咁諗下因由, 反省下係咪我嘅問題, 係咪我問得唔夠明顯呢? 之後我同過一批同學仔gathering, 問過佢地點解上堂咁鍾意黑面, 咁鍾意唔答我問題呢? 佢地話:「Miss, 好多時我好想答㗎, 但無論答得啱定錯, 一定會俾周圍嘅同學眼望望, 好鬼尷尬。」哈, 原來你地係怕俾人望呀? 咁以下依堆職業你地第時咪唔會做?
- 老師 / 校長 / 教授 / 權威學者 (有好多學生望住你)
- 藝人 / 名人 (有萬千觀眾望住你)
- 老闆 (有好多員工望住你)
- 律師 / 大法官 (庭內有好多人望住你)
- 警察 / 海關 / 消防員 (好多市民望住你)

仲有好多, 不能盡錄。我真係唔明, 點解你地咁怕人望呢? 如果真係咁怕講錯嘢會好冇面, 咁第日做老師咪怕上堂講錯嘢, 做歌星就怕唱錯歌詞, 做老闆又怕話錯員工, 做律師怕講錯當事人個名, 做警察咪唔敢拉人?

另一個懶醒嘅同學咁同我講:「Mia, 雖然我唔答出聲啫, 我知你問乜嘅, 一陣你又會開估嘅, 我一樣係答中, 不過我冇俾你知我識, 我自己知咪得囉。」嗱, 我話俾你地知個分別吖。如果我問你地識唔識某個中文字嘅英文係乜, 冇人答出聲的話, 我就覺得你地連最基本果隻字都唔識, 咁我就教最淺果隻字。但如果有叻嘅同學開聲答到我問題, 我就覺得原來你地基本功都ok, 我就會即刻再教多一個更高層次嘅字, 咁到頭來, 邊個賺左呢???

所以呢, 我奉勸各位怕醜同學反思一下, 越成功嘅人, 越唔可以怕醜, 越要勇敢嘗試! 試咗得嘅話, 你即時成功! 試咗唔得, 起碼你可以即時知自己衰乜, 改咗佢, 下一次成功咪就係你囉~
2014年2月